Անհրաժեշտ գույք և սարքավորումներ՝ ԼՂՀ մայրաքաղաքին

ԼՂՀ անկախության 20-ամյակի կապակցությամբ Երևանի քաղաքապետարանը Ստեփանակերտի քաղաքապետարանին է նվիրել հատուկ քաղաքային այգիների և շենքերի հարակից տարածքների սիզամարգերի հարթեցման համար խոտհնձիչներ, քաղաքային աղբամաններ, փողոցային լուսավորության անհրաժեշտ պարագաներ:

Ինչպես տեղեկացնում է Երևանի քաղաքապետարանի տեղեկատվության և հասարակայնության հետ կապերի վարչությունը, Ստեփանակերտի Մուրացանի անվան գրադարանը Երևանի քաղաքապետարանի աջակցությամբ համալրվել է շուրջ 1000 կտոր գեղարվեստական գրականությամբ, իսկ դպրոցներին և մանկապարտեզներին մարզական գույք է տրվել:

Առաջիկայում Ստեփանակերտի երկու մուտքերի մոտ և կենտրոնական հրապարակում կտեղադրվեն մեծ ժամացույցներ:

Մայրաքաղաքն այսուհետև կունենա նաև արտակարգ իրավիճակների կառավարման նոր համակարգ: Երևանի քաղաքապետարանի ենթակայության բուժհաստատությունների նեղ մասնագիտական ուղղվածության թվով 18 բարձրակարգ բժիշկներ 3 օր շարունակ Ստեփանակերտի համաբուժարանում, 2 հիվանդանոցներում և Մարտակերտի շրջանի Գետավանի տեղամասային հիվանդանոցում ընդունել են հարյուրավոր հիվանդների: Բաց դռների շրջանակում անվճար բուժսպասարկում և, ըստ անհրաժեշտության, դեղորայք է տրամադրվել բոլոր այցելուներին: Կատարվել են նաև վիրահատություններ: