Թունիսի նախագահը հայտարարել է կառավարության կազմալուծման և պատգամավորներին անձեռնմխելիությունից զրկելու մասին

Թունիսի նախագահ Քայս Սաիդը պաշտոնից հեռացրել է երկրի վարչապետ Հիշամ Մաշիշին և սառեցրել Ժողովրդական ներկայացուցիչների ասամբլեայի (խորհրդարան) լիազորությունները: Այս մասին Թունիսի ղեկավարը հայտնել է երկրի բարձրագույն ռազմական ղեկավարության ներկայացուցիչների հետ հանդիպման ժամանակ:

Ըստ Սաիդի՝ Թունիսի օրենսդիր մարմնի անդամներին զրկել են անձեռնմխելիությունից:

Նախագահը ստանձնելու է գործադիրի լիազորությունները արտակարգ միջոցառումների ընթացքում երկրի նոր վարչապետի հետ, որը նշանակվելու է ավելի ուշ:

Նախագահի խոսքով՝ ինքը համապատասխան որոշումներ է կայացրել Մաշիշիի և խորհրդարանի նախագահ Ռաշիդ ալ Գանուշիի հետ խորհրդակցելուց հետո: Նախագահը շեշտել է, որ անհրաժեշտ քայլեր կձեռնարկի այնքան ժամանակ, քանի դեռ երկրում «սոցիալական խաղաղություն» չի հաստատվել:

Իր հերթին, «Ալ Նահդա» շարժման առաջնորդը և Թունիսի խորհրդարանի նախագահ Ռաշիդ ալ Գանուշին վարչապետին պաշտոնանկ անելը համարել են «հեղաշրջում» և երկրի քաղաքացիներին կոչ արել՝ «խաղաղորեն պայքարել ժողովրդավարության վերականգնման համար»: 

Երկրի ղեկավարի որոշումը կայացվել է զանգվածային բողոքների ֆոնին, որոնք բռնկվել էին երկրում՝ կապված տնտեսական ծանր իրավիճակի և կորոնավիրուսի տարածման հետ: