Վկաներն ասել են, որ պարոն Չարչյանի խոսքերը որպես հարկադրանք չեն դիտել, այլ՝ խնդրանք․ դատարանի որոշումը կհրապարակվի հուլիսի 8-ին

Դատարանը հեռացավ խորհրդակցական սենյակ՝ Արմեն Չարչյանի կալանքի դեմ բողոքի միջնորդությունը քննելու։ Որոշումը կհրապարակվի հուլիսի 8-ին՝ ժամը 11։00-ին։ Այս մասին դատարանի բակում լրագրողների հետ զրույցում ասաց փաստաբան Էրիկ Ալեքսանյանը։ 

Փաստաբանը հայտնեց, որ ներկա պահին Արմեն Չարչյանը «Վարդաշեն» ՔԿՀ-ում է, տեղափոխել են շաբաթ օրը։

«Հիմքերի տեսանկյունից՝ դատախազը շարունակում է պնդել, որ քննությանը խոչընդոտելու ռիսկը մեծ է, ու առկա պայմաններում եթե մնա ազատության մեջ, վկաների վրա ազդեցություն կգործադրի: Մենք ներկայացրել ենք մեր հակափաստարկները»,- ասաց նա:

Ալեքսանյանի խոսքով՝ մեղադրական բնույթի ցուցմունք, պաշտպանության կողմի գնահատմամբ, առկա չէ։ «Վկաներն ասում են, որ պարոն Չարչյանի խոսքերը որպես հարկադրանք չեն դիտել, այլ՝ հորդոր, խնդրանք»,- ասաց նա: