56 միլիոն դրամի գողության գործով վերաքննիչ դատարանի որոշումը կհրապարակվի վաղը

«Մանանա Գրեյ» ընկերությունից 56 միլիոն 400 հազար դրամի գողության գործով այսօր վերաքննիչ քրեական դատարանում ավարտվեց դատաքննությունը: Դատարանը,  դատավոր Կարինե Ղազարյանի նախագահությամբ, լսեց ամբաստանյալներ Աշոտ Առուշանյանի և Էդգար Կարաքեշիշյանի փաստաբանների և մեղադրողի ճառերը, այնուհետև` ամբաստանյալների վերջին խոսքն ու անցավ խորհրդակցական սենյակ:

Ամբաստանյալ Աշոտ Առուշանյանը մեղադրվում է կատարված գողությանը օժանդակելու մեջ: Նրա պաշտպան Լիպարիտ Սիմոնյանն իր ճառի ընթերցումը սկսել էր նախորդ դատական նիստին և ավարտեց այսօր: Իր խոսքում նա շեշտեց, որ առաջին ատյանի դատարանը, որն իր պաշտպանյալին դատապարտել է 5.5 տարվա ազատազրկման, մեղադրական դատավճռի հիմքում դրել է վարկած, այլ ոչ թե հիմնավորված ապացույց:

Այսպիսով` Աշոտ Առուշանյանի դեմ միակ ապացույցը եղել են գործով ամբաստանյալ անցնող և ներկայումս հանգուցյալ Արտաշես Գալուստյանի ցուցմունքները, որը նա տվել է կալանքից ազատ արձակվելուց մեկ օր առաջ: Իսկ կալանքից ազատվելուց օրեր անց ինքնասպան է եղել: Փաստաբանի խոսքով` կան ապացույցներ, որ Արտաշես Գալուստյանը երրորդ անձի դեմ, այսինքն` Աշոտի դեմ ցուցմունք տվել է խոշտանգումների և այլ պայմանավորվածությունների արդյունքում: Նրա խցակից Տիգրան Առաքելյանն իր ցուցմունքներում նշել է, որ Արտաշեսը վատ հոգեվիճակում է եղել, իրեն պատմել է, որ ձերբակալելուց հետո իրեն նվաստացրել են, ծեծել, նույնիսկ տուժողները կարողացել են ներս մտնել և ոստիկանության բաժանմունքում ծեծի ենթարկել իրեն: Ասել է նաև, որ իր դեմ կիրառված խափանման միջոցը փոխվելու է, այսինքն` կալանքից ազատ է արձակվելու, սակայն ինքը դա չի ուզում, վախենում է, որ ազատության մեջ տուժողները կարող են գտնել իրեն: Կալանավայրում մի քանի անգամ փորձել է ինքնասպանություն գործել, լամպը կոտրել է և կոտրված ապակիով վնասել պարանոցը, փորձել է սավանով կախվել, իրեն նետել է դանակի վրա: Մի քանի անգամ կրկնել է, թե` «կախվեմ-պրծնեմ»: Տ. Առաքելյանի այս ցուցմունքները հաստատվել են նաև Գալուստյանի մյուս խցակիցների կողմից:

Փաստաբանի խոսքով` առաջին ատյանի դատարանը պետք է դիմեր դատախազություն` վերոնշյալի վերաբերյալ քրեական գործ հարուցելու միջնորդությամբ, ինչը չի արել: Դատարանը պետք է նույն կերպ վարվեր նաև Աշոտ Առուշանյանի դեպքում. նա բազմիցս պնդել է, որ նախաքննության ընթացքում իր հանդեպ հոգեբանական ճնշումներ են կիրառվել, հորդորել են ինքնախոստովանական ցուցմունքներ տալ, ավելին` ձերբակալել են բազմամարդ վայրում, բռնությամբ, այնինչ` Քրեական դատավարության օրենսգիրքը սահմանում է անձին կանչելու կարգը` ծանուցման միջոցով:

Լ. Սիմոնյանը նշեց նաև, որ առաջին ատյանի դատարանի կողմից անթույլատրելի ապացույց է ճանաչվել Աշոտ Առուշանյանի և Արտաշես Գալուստյանի միջև առերեսումը, քանի որ դրան Առուշանյանի նախկին փաստաբանը շուրջ 40 րոպե բացակայել է:

Իսկ ինչ վերաբերում է Գալուստյանի վերջին ցուցմունքին, որում հայտնել է, թե Առուշանյանն է իրենց տեղեկություններ հայտնել «Մանանա Գրեյի» և գողացված փողերի վերաբերյալ, ապա փաստաբանը նշեց, որ ինչո՞ւ Արտաշեսը նախկինում տված իր 5 խոստովանական ցուցմունքներում չէր հիշատակել ո'չ Աշոտին, ո'չ էլ նրանից որևէ տեղեկություն ստանալու մասին: Գալուստյանի այս ցուցմունքը նույնպես անթույլատրելի ապացույց է ճանաչվել առաջին ատյանի դատարանի կողմից, սակայն, այնուամենայնիվ, դատարանը մեղադրական դատավճիռ է ընդունել:

Լիպարիտ Սիմոնյանը նշեց նաև, որ ապացուցված չէ, որ Աշոտ Առուշանյան նման հանցագործություն անելու շարժառիթ է ունեցել: Նա գերազանցությամբ ավարտել է դպրոցը, համալսարանը, ձերբակալությունից 8 օր հետո պիտի պաշտպաներ թեկնածուական ատենախոսությունը, ընտանիքը ապահովված էր, բարձր վարձատրվող աշխատանք և փայլուն կարիերա անելու հնարավորություններ ուներ և չուներ որևէ մոտիվացիա` իր ապագան կասկածի տակ դնելու համար: Փաստաբանը պահանջեց իր պաշտպանյալին արդարացնել:

Մյուս ամբաստանյալ Էդգար Կարաքեշիշյանը, ով մեղադրվում է հանցագործությանը մասնակից լինելու մեջ, առաջին ատյանի դատարանի կողմից դատապարտվել է 7 տարվա ազատազրկման: Նրա պաշտպան Ռաֆիկ Սաֆարյանն իր պաշտպանական ճառում նույնպես հայտնեց, որ Էդգարի մեղքն ապացուցող հիմքեր չկան: Վկաները հստակ չեն ասել, թե դեպքի վայրում տեսել են իր պաշտպանյալին, այլ պարզապես նմանեցրել են նրան, մյուս կողմից` տարածքը նկարահանող տեսախցիկներից ստացված նյութերը մոնտաժված են, և փորձաքննության արդյունքներն էլ ցույց են տվել, որ դրանց միջոցով անձին նույնականացնել հնարավոր չէ:

Իսկ այն, որ մեքենայի վրա, որտեղից գողացվել է գումարը, հայտնաբերվել է հագուստի մի փոքր կտոր և դրա նման շապիկ հայտնաբերվել է Էդգարի տանը, նույնպես չի կարող իր պաշտպանյալի մեղքի ապացույց լինել, քանի որ փորձագետը հստակ եզրակացություն չի տվել, որ գտնված կտորը Էդգարի հագուստի բաղկացուցիչն է, և այդ կտորը կարող էր մեքենայի վրա հայտնվել տարբեր ճանապարհներով:

Ինչ վերաբերում է Արտաշես Գալուստյանի` Էդգարի դեմ տրված ցուցմունքներին, ապա փաստաբանը հայտնեց, որ Էդգարը հնարավորություն չի ունեցել նրա հետ առերեսվելու: Փաստաբան Ռ. Սաֆարյանը դատարանին խնդրեց արդարացնել իր պաշտպանյալին, կամ եթե, այնուամենայնիվ, համաձայն չլինեն իր դիտարկումների հետ, մեղմ պատիժ նշանակել նրա հանդեպ:

Այնուհետև մեղադրական ճառով հանդես եկավ դատախազ Տիտալ Ուզոյանը: Նա իր խոսքում նշեց,  թե հաստատված հանգամանքներ են, որ Աշոտն ու Էդգարը մտերիմ ընկերներ են, Աշոտը եղել է բանկի աշխատող և սպասարկել է «Մանանա Գրեյի» փոխտնօրեն Արմեն Մանուկյանին և մեծ գումարներ է վերցրել նրանից` որպես բանկի աշխատող, տեղյակ է եղել ընկերության ֆինանսական շարժին: Եվ, Ա. Գալուստյանի ցուցմունքի համաձայն, Աշոտն է բանկային գաղտնի փաստաթուղթ փոխանցել իրենց` ընկերության ֆինանսական շարժի վերաբերյալ:

Ինչ վերաբերում է առաջին ատյանի կողմից Գալուստյանի ցուցմունքներն անթույլատրելի ապացույց ճանաչելուն, ապա դատախազը հայտնեց, որ դատարանը խախտմամբ է նման որոշում ընդունել, և վերաքննիչ ատյանին խնդրեց վերանայել այն: Մեղադրող դատախազը միջնորդեց առաջին ատյանի մեղադրական դատավճիռը թողնել անփոփոխ:

Ռեպլիկով հանդես եկան պաշտպանները և նշեցին, որ դատախազն իր ճառի հիմքում դրել է միայն դատարանի կողմից արդեն իսկ անթույլատրելի ճանաչված ապացույցներ:

Կողմերին լսելուց հետո դատարանն անցավ խորհրդակացական սենյակ` դատական ակտ ընդունելու համար: Այն կհրապարակվի վաղը` ժամը 11:50-ին: