Նախկինում ընտրության գնում էին որպես հաղթած ժողովուրդ, այս ընտրությունը լինել-չլինելու հարց է. Ռ. Քոչարյան

Սելիմի ճանապարհը երեւի Հայաստանի անկախությունը ձեռք բերելուց հետո առաջինն էր, որ զրոյից կառուցվեց, կապեց Վայոց Ձորը Գեղարքունիքի հետ, որը նոր շունչ հաղորդեց, նոր կապեր ստեղծեց, շարժ ապահովեց: Հենց այդ տարիներին առաջին աջակցությունը եղավ գինեգործությանը: Նոր, փոքր գինեգործական ընկերություններ հիմնվեցին այստեղ, եւ այստեղից սկսվեց գինեգործության զարգացման նոր թափ Հայաստանում,-Վայքի ընտրողների հետ հանդիպման ժամանակ, ըստ Yerkir.am-ի, հայտարարեց «Հայաստան» դաշինքի առաջնորդ, Հայաստանի երկրորդ նախագահ Ռոբերտ Քոչարյանը: Դաշինքի առաջնորդը հիշեցրեց նաեւ, որ այդ տարիներին Հայաստանում ստեղծվեց առաջին կաթիլային ոռոգման համակարգը, ինչը կտրուկ բարձրացրեց գյուղատնտեսության ցուցանիշները: «Այդ տարիներին ձեր արտադրածի մթերման հարց չեք ունեցել: Ընդհանրապես, այդ տարիներին Հայաստանում գյուղարտադրանքի մթերման հարց երբեք չի եղել: Եւ չի եղել մի տարի, որ ձեռք չմեկնեին հողի հետ աշխատող մարդկանց՝ պարարտանյութի, սերմացուի ձեւով: Այս ամենը ընկալվում է որպես անցյալում ինչ-որ երեւույթներ, վստահեցնում եմ ձեզ, որ այդ պրակտիկան շարունակվելու է»,-ասաց Ռոբերտ Քոչարյանը: «Հայաստան» դաշինքի առաջնորդի խոսքով՝ նախկինում հայաստանցին ընտրությունների գնում էր որպես հաղթած ժողովուրդ: «Բանավեճերը գնում էին հետեւյալի շուրջ՝ սա լա՞վ է, Թե՞ վատ է: Կոռուպցիան շա՞տ է, թե՞ քիչ: Բայց լինել-չլինելու հարց չի եղել, ես չեմ հիշում նման ընտրություններ»,-ըստ Yerkir.am-ի, հայտարարեց «Հայաստան» դաշինքի առաջնորդը: Մանրամասն՝ տեսանյութում: