ՆԱՏՕ-ն Ռուսաստանի ու Չինաստանի համագործակցությունը դաշինքի համար մարտահրավեր է համարում

Ռուսաստանի և Չինաստանի միջև քաղաքական ու ռազմական ոլորտում համագործակցության ակտիվ զարգացումը լուրջ մարտահրավեր է ՆԱՏՕ-ի համար: Այս մասին հունիսի 7-ին հայտարարել է ՆԱՏՕ-ի գլխավոր քարտուղար Իենս Ստոլտենբերգը La Repubblica իտալական թերթին տված հարցազրույցում:

Ստոլտենբերգի հարցազրույցը տպագրվել է «Չինաստանի և Ռուսաստանի դաշինքից Արևմուտքի համար նոր վտանգներ» վերնագրով:

«Վերջերս Ռուսաստանը և Չինաստանը շարունակում են ինտենսիվ համագործակցությունը ինչպես քաղաքական, այնպես էլ ռազմական մակարդակներում: Սա նոր հարթություն է և լուրջ մարտահրավեր ՆԱՏՕ-ի համար: Արդյունքում՝ նոր վտանգներ են առաջանում»,- ասում է Ստոլտենբերգը:

Դաշինքի գլխավոր քարտուղարի մտահոգությունները կապված են այն փաստի հետ, որ Մոսկվան և Պեկինը գնալով սկսում են համաձայնեցնել դիրքորոշումները միջազգային կազմակերպություններում որոշումների վերաբերյալ, օրինակ՝ ՄԱԿ-ում: ՆԱՏՕ-ն մտահոգված է նաև չին-ռուսական համատեղ զորավարժություններով:

Ստոլտենբերգը նշել է, որ ՆԱՏՕ-ն պետք է «հարմարվի ավելի ու ավելի մրցակցային գլոբալ անվտանգության համատեքստում»:

Հիշեցնենք, որ հունիսի 4-ին Ստոլտենբերգը Վաշինգտոնի Բրուքինգսի ինստիտուտում կայացած խորհրդաժողովում ասել էր, որ ՆԱՏՕ-ն ձգտում է ակտիվացնել իր ջանքերը`պատասխանելով Ռուսաստանի և Չինաստանի համաշխարհային մրցակցությանը: