Մի քանի շաբաթվա ընթացքում Վրաստանը կբացի ցամաքային սահմանները

Վրաստանի իշխանությունները ծրագրում են մի քանի շաբաթվա ընթացքում բացել ցամաքային սահմանները. հայտարարել է Վրաստանի էկոնոմիկայի և կայուն զարգացման նախարար Նաթիա Տուրնավան:

Նախարարի կանխատեսումների համաձայն՝ ամենայն հավանականությամբ, այդ ժամանակ կավարտվի կորոնավիրուսի երրորդ ալիքը:

«Ցամաքային սահմանների անվտանգ բացումը զբոսաշրջության հիմնական խթաններից է: Ընդհանրապես, պլանավորված է ցամաքային սահմանների բացում, բայց ժամանակի ընթացքում դա պետք է համընկնի երրորդ ալիքի ավարտի հետ: Սա, հավանաբար, առաջիկա մի քանի շաբաթների խնդիր է»,– ասել է Տուրնավան լրագրողներին։

Վրաստանի իշխանությունները փակել են ցամաքային սահմանները, այդ թվում՝ Ռուսաստանի հետ, 2020 թվականին՝ կորոնավիրուսային համաճարակի պատճառով: Միևնույն ժամանակ, Ռուսաստանի Դաշնության քաղաքացիները կարող են Վրաստան հասնել օդային ճանապարհով: Վրաստանի իշխանությունների ներկայացուցիչները հայտնել են, որ համաճարակի պայմաններում ավելի հեշտ է վերահսկել օդային ճանապարհով ժամանող զբոսաշրջիկների առողջությունը, քան ցամաքայինով ժամանողներինը:

Վրաստանը սահմաններ ունի Թուրքիայի, Հայաստանի, Ադրբեջանի և Ռուսաստանի (ներառյալ՝ Աբխազիա և Օսիա) հետ: