Ռամադանի ավարտից հետո Սաուդյան Արաբիան Դամասկոսում դեսպանատուն կբացի

Սաուդյան Արաբիայի դեսպանատունն իր աշխատանքը կվերսկսի Դամասկոսում Իդ ալ Փիթր տոնից հետո, որով մայիսի 13-ին ավարտվում է Ռամադան մուսուլմանական պահքը: Այս մասին երեքշաբթի հաղորդել է արաբական Rai Al Youm թերթը, որը լույս է տեսնում Լոնդոնում: Ըստ պարբերականի՝ թագավորության արտաքին գործերի նախարար, արքայազն Ֆեյսալ բին Ֆարհան ալ Սաուդի գլխավորած պատվիրակությունը կմասնակցի Սիրիայի մայրաքաղաքում Սաուդյան Արաբիայի դիվանագիտական առաքելության բացման արարողությանը:

Հրապարակման համաձայն՝ երկուշաբթի՝ գրեթե 10 տարվա ընդմիջումից հետո, սիրիա-սաուդական հարաբերությունների կարգավորման մասին համաձայնություն է ձեռք բերվել Սաուդյան Արաբիայի գաղտնի ծառայության ղեկավար Խալեդ ալ Խմեյդանի և Սիրիայի նախագահ Բաշար ալ Ասադի ու Սիրիայի ազգային անվտանգության բյուրոյի ղեկավար Ալի ալ Մամլուքի միջև: «Սաուդյան հյուրը սիրիական կողմին է փոխանցել, որ Ռիադը ողջունելու է Դամասկոսի վերադարձը Արաբական պետությունների լիգայի շարքերը և նրա մասնակցությունը Ալժիրի միջաարաբական համայնքի գագաթնաժողովին»,- նշում է Rai Al Youm-ը:

Պարբերականի տեղեկություններով ՝ Սաուդյան Արաբիայի գաղտնի ծառայության ղեկավարի այցը Դամասկոս տեղի է ունեցել Բաղդադում կայացած սաուդա-իրանական գաղտնի բանակցություններից երկու շաբաթ անց: Ապրիլի 28-ին Սաուդյան Արաբիայի թագաժառանգ արքայազն Մուհամեդ բեն Սալման ալ Սաուդը հեռուստատեսային հարցազրույցում հայտարարել էր «Իրանի հետ ամուր գործընկերություն հաստատելու ցանկության մասին»: Այս բառերը ընկալվում էին որպես Թեհրանի և Դամասկոսի հետ կապեր հաստատելու՝ Ռիադի մտադրություն: Սաուդյան Արաբիայի իշխանություններն այժմ ամբողջովին դադարել են աջակցել սիրիական ընդդիմությանը և փակել են ընդդիմադիր Սիրիայի բանակցային կոմիտեի գրասենյակը, որը Էր Ռիադում էր 2017 թվականից:

Դամասկոսում 2018 թվականի դեկտեմբերի 27-ին դեսպանատուն էր բացել Արաբական Միացյալ Էմիրությունները: Դամասկոսի մասնակցությունը Արաբական լիգային դադարեցվել էր 2011-ի նոյեմբերին: Արաբական երկրների մեծ մասը Սիրիայի մայրաքաղաքից հետ էր կանչել դեսպաններին և միացել Սիրիայի նկատմամբ տնտեսական բոյկոտին: Հակամարտության ընթացքում Սաուդյան Արաբիան, Քաթարը և մի շարք այլ պետություններ ֆինանսական և ռազմական օգնություն են ցուցաբերել Սիրիայի կառավարության դեմ հանդես եկող զինված խմբավորումներին: