Սիրիայի խորհրդարանը նշանակել է նախագահական ընտրություններ օրը

Նախագահի ընտրությունները Սիրիայում տեղի կունենան մայիսի 26-ին: SANA գործակալությունը հայտնում է, որ այս մասին կիրակի օրը հայտնել է հանրապետության Ժողովրդական խորհրդի (խորհրդարանի) նախագահ Համուդա Սաբաղը:

«Գերագույն Սահմանադրական դատարանում թեկնածուների առաջադրման փաստաթղթերի ընդունումը կսկսվի ապրիլի 19-ին և կտևի 10 օր՝ մինչև ապրիլի 28-ը»,- ասել է նա:

Ըստ Սաբաղի՝ ժողովրդի կամարտահայտումը տեղի կունենա երկրի համար կարևոր պահին: «Երբ մեր քաջարի բանակը պատերազմի դաշտում բախվում է ահաբեկիչների հետ, յուրաքանչյուր քաղաքացու պարտքն է կիրառել իր սահմանադրական իրավունքը և մասնակցել ընտրություններին՝ խափանելու համար Սիրիայի դեմ ուղղված դավադրությունները»,- շեշտել է խորհրդարանի խոսնակը:

Նախորդ նախագահական ընտրությունները Սիրիայում անցկացվել էին 2014-ին՝ այլընտրանքային հիմունքներով: Քվեարկությանը մասնակցել էր Սիրիայի քաղաքացիների 73,5%-ը: «Արաբական սոցիալիստական վերածնունդ» կուսակցության առաջնորդ Բաշար ալ Ասադը հաղթել էր ընտրություններում՝ ստանալով ընտրողների 88,7%-ի աջակցությունը: