Ունեմ զբաղվելու շատ ոլորտներ. Ա. Հովհաննիսյանը դուրս եկավ ՊՆ-ից և ռազմական ոլորտից

Երեկ մամուլում լուրեր տարածվեցին, որ աշխատանքից ազատման զեկուցագիր է ներկայացրել պաշտպանության նախարարության ներկայացուցիչ Արծրուն Հովհաննիսյանը, որը ՊՆ ղեկավար կազմը ստորագրել է:

Այսօր Yerkir.am-ի հետ զրույցում Արծրուն Հովհաննիսյանը հաստատեց լուրը. նա դուրս է եկել պաշտպանության նախարարությունում զբաղեցրած իր պաշտոնից (2020 թ. մարտ-հուլիս ամիսներին հանդիսանալով ՀՀ ՊՆ Վ. Սարգսյանի անվան ռազմական համալսարանի մարշալ Հովհաննես Բաղրամյանի անվան հրամանատարաշտաբային ֆակուլտետի պետ՝ նույն թվականի հուլիսից պաշտպանության նախարարությունում զբաղեցնում էր կադրային և ռազմակրթական քաղաքականության գլխավոր վարչության կրթության վարչության պետի պաշտոնը):  

Մամուլում տեղեկություն էր սփռվել նաև, որ, առողջական խնդիրներից զատ, Արծրուն Հովհանիսյանը կոնկրետ աշխատանքային խնդիրներ է ունեցել նաև նորանշանակ նախարար Վաղարշակ Հարությունյանի հետ, և նրա՝ աշխատանքից հեռանալու պատճառներից մեկը նաև այդ հակասությունն է եղել:

Yerkir.am-ի հետ զրույցում Արծրուն Հովհաննիսյանը հերքեց Վաղարշակ Հարությունյանի հետ խնդիրներ ունենալու մասին լուրերը:  Հարցին՝ դո՞ւրս է գալիս ռազմական ոլորտից, Արծրուն Հովհաննիսյանը պատասխանեց. «Այո, բայց ունեմ ինձ համար զբաղվելու շատ ոլորտներ, այդ թվում՝ կրթության մեջ»։

Հարցին՝ արդյո՞ք դուրս գալը պայմանավորված է պատերազմից հետո ստեղծված իրավիճակով, մեր զրուցակիցն արձագանքեց. «Այո, առայժմ չմանրամասնեմ, թող գաղտնի մնա դա»:

Հիշեցնենք՝ Արծրուն Հովհաննիսյանը, բացի ՊՆ-ում զբաղեցրած պաշտոններից, նաև ռազմական պատմաբան է, ունի բազմաթիվ գիտական աշխատանքներ, մենագրություններ ու ուսումնասիրություններ ինչպես հայ, այնպես էլ համաշխարհային ռազմարվեստի պատմության և տեսության մասին: Ներգրավվելով ռազմական ինստիտուտի աշխատանքներում (Ա. Հովհաննիսյանն ունի պատմական գիտությունների թեկնածուի գիտական աստիճան)՝ նա նաև նպատակ ուներ առանձին գիտակրթական հաստատության հիմնման միջոցով Հայաստանում զարգացնել ռազմարվեստի ուսումնասիրման ոլորտը: 2017 թվականից Ա. Հովհաննիսյանը ՀՀ ԳԱԱ պատմության ինստիտուտում գրում է դոկտորական ատենախոսություն՝ «Բանակաշինությունը Հայաստանում 1918-2010 թթ.» թեմայով:

Հ.Գ. Մեր հետ զրույցում Ա. Հովհաննիսյանի ձայնն ամենևին առաջվանը չէր, ինչը նա բացատրեց առողջական խնդրի խորացմամբ: