ԱԺ-ն երկրորդ ընթերցմամբ եւ ամբողջությամբ ընդունեց ԸՕ-ի փոփոխությունների նախագիծը. իշխանությունը հրաժարվեց ռեյտինգային ընտրակարգից

Ազգային ժողովի արտահերթ նիստում 82 կողմ ձայների քվեարկությամբ երկրորդ ընթերցմամբ այսօր՝ ապրիլի 1-ին, ընդունվեց «Հայաստանի Հանրապետության ընտրական օրենսգիրք» սահմանադրական օրենքում փոփոխություններ եւ լրացումներ կատարելու մասին օրենքի նախագիծը: 

Այս նախագծով իշխանությունը հրաժարվեց ռեյտինգային ընտրակարգից և պատրաստվում է ընտրության գնալ համամասնական ընտրակարգով:

«Փակ համամասնական, փակ ցուցակների դեպքում առաջին դեմքերի կամ կուսակցությունների առաջին դեմքերի մրցակցությունը քաղաքագիտական կանոն է, և այստեղ որևէ մտահոգություն չի կարող լինել առ այն, որ առաջին դեմքերի մրցակցություն է: Հակառակը՝ անոմալիան այն է, որ տարածքային ընտրակարգերի լիստերի դեպքում, ցանկերի, ցուցակների դեպքում ընտրությունը տեղական բիզնես մարդկանց կամ այլ ապաքաղաքական շրջանակների միջև ռեսուրսների պայքարի մասին է»,- քվեարկությունից առաջ ասաց նախագծի հարակից զեկուցող, արդարադատության նախարարի տեղակալ Քրիստինե Գրիգորյանը:

Ընդդիմադիր խմբակցությունները քվեարկությանը չեն մասնակցել։

Նախագծի համահեղինակներն են ԱԺ պատգամավորներ Արման Բաբաջանյանը, Սերգեյ Բագրատյանը, Վահագն Հովակիմյանը եւ Համազասպ Դանիելյանը:

Նշենք, որ նախագծով առաջարկվում է հանել ռեյտինգային ընտրակարգը եւ ներդնել փակ համամասնական ցուցակներով ընտրակարգը: