Նախագահի և վարչապետի հանդիպումը համարում եմ անբովանդակ և ձևական. իրենց պետք էր ձևական մաս, իսկ մենք դրանում չկանք. Իշխան Սաղաթելյան

Նիկոլ Փաշինյանը և նախագահը պատրաստ չեն լուրջ օրակարգով հանդիպման և քննարկման: Ես նախագահի և վարչապետի հանդիպումը համարում եմ անբովանդակ և ձևական: Այս մասին «Փաստինֆո»-ի հետ զրույցում ասաց ՀՅԴ Հայաստանի ԳՄ ներկայացուցիչ, Հայրենիքի փրկության շարժման համակարգող Իշխան Սաղաթելյանը՝ անդրադառնալով նախագահի և վարչապետի այսօրվա հանդիպմանը.

«Իրենք իրար հետ կարող են քննարկել երկրի սահմանադրական կարգը տապալելու, օրենքներ խախտելու վերաբերյալ հարցեր, բայց բուն օրակարգի և ստեղծված ճգնաժամից դուրս գալու ելքեր, առանց հիմնական կողմի, իրենք չեն կարող քննարկել»,-ասաց զրուցակիցը:

Քաղաքական գործիչն արձանագրում է, որ Նիկոլ Փաշինյանը դիրքորոշում չի հայտնել արդյո՞ք համաձայն էր ՀՓՇ-ի առաջարկին՝ հանդիպել ԱԺ-ում, ուղիղ հեռարձակմամբ և հստակ օրակարգով.

«Նրանք ձևական, անիմաստ պատկեր ստանալու համար՝ ինչ-որ նախաձեռնություն էին ցույց տալիս, հակառակ դեպքում, ջանք կգործադրեին, որ այդ հանդիպումը տեղի ունենար, որովհետև մենք այդ հանդիպումը չմերժեցինք, այլ հստակություն մտցրինք: Իրենց պետք էր ձևական մաս, իսկ մենք դրանում չկանք»:

Իշխան Սաղաթելյանը նաև վստահեցրեց, որ նախագահի հետ կհանդիպեն միայն իրենց ներկայացրած պայմաններին համաձայնելու դեպքում:

Աղբյուր` Փաստինֆո