Հունաստանն ավարտել է Էգեյան ծովում՝ Թուրքիայի սահմանների մոտ, «դրոնների կղզու» վերազինումը

Ապրիլին Հունաստանի ռազմաօդային ուժերը կստանան իսրայելական արտադրության Heron առաջին երկու անօդաչու թռչող սարքերը: Հետախուզական անօդաչու թռչող սարքերը ձեռք կբերվեն վարձակալության հիմունքներով. հայտնում է հունական մամուլը:

ԱԹՍ-ները տեղակայվելու են Սկիրոս կղզում, որը ռազմավարական դիրք է զբաղեցնում Էգեյան ծովի կենտրոնական մասում: Բացի այդ` Հունաստանը մշակում է սեփական անօդաչու ինքնաթիռներ արտադրելու ծրագիրը:

Հիշեցնենք, որ Իսրայելը մտադիր է Հունաստանին վաճառել զենքեր և զենքի համակարգեր, որոնք հույներին տարածաշրջանում «որակական առավելություն» կտան, հատկապես` Թուրքիայի դեմ պայքարում: Մասնավորապես` դրանք բարձր ճշգրտության համակարգեր են, որոնք ունակ են պայքարել թուրքական ԱԹՍ-ների դեմ:

Հունվարի սկզբին Իսրայելի և Հունաստանի պաշտպանության նախարարությունները  1,68 միլիարդ ԱՄՆ դոլարի համագործակցության համաձայնագիր են ստորագրել՝ նախատեսված 20 տարվա համար: Փաստաթուղթը նախատեսում է Հունաստանի ռազմաօդային ուժերի համար թռիչքային դպրոցի ստեղծում, տասը M-346 ինքնաթիռների գնում, T-6 ինքնաթիռների սպասարկում: