Նախ պետք է լսենք ձկնորսներին. Չավուշօղլուն՝ Էգեյան ծովում տեղի ունեցած միջադեպի մասին

Երեկ Էգեյան ծովում գտնվող ռուսական «Սմետլիվի» պարեկային նավի անձնակազմը նախազգուշական կրակ է բացել թուրքական ձկնորսական նավի ուղղությամբ, որը մոտենալիս է եղել ռուսական նավին՝ չպատասխանելով անձնակազմի զգուշացումներին:

Թուրքիայի ԱԳ նախարար Մևլութ Չավուշօղլուն, ով Հռոմում Լիբիայի հարցով համաժողովին է մասնակցել, մեկնաբանել է միջադեպը՝ հայտնելով, որ իրենք լարվածության աճի կողմնակից չեն:

Ըստ Hurriyet-ի՝ Թուրքիայի ԱԳ նախարարը նշել է, որ իրենք արդեն լսել են միջադեպի մասին ռուսական կողմի հայտարարությունը նավի ուղղությամբ նախազգուշական կրակ բացելու վերաբերյալ:

«Բայց մենք միշտ ասում ենք՝ լարվածության կողմնակից չենք, լարվածությունը բանակցության ճանապարհով պետք է հաղթահարենք»,-ասել է Չավուշօղլուն՝ նշելով, որ նոյեմբերի 24-ին տեղի ունեցած «տխուր դեպքից» հետո իրենք միշտ քայլեր են ձեռնարկել լարվածությունը թուլացնելու ուղղությամբ:

«Մենք նախ պետք է լսենք ձկնորսներին, ապա անհրաժեշտ հայտարարությունով հանդես գանք»,- ասել է նա: