Էգեյան ծովում միգրանտներով նավակ է խորտակվել

Էգեյան ծովի հյուսիսում ապօրինի ներգաղթյալներ տեղափոխող մոտորանավակ է խորտակվել։ Այս մասին հաղորդում է Anadolu գործակալությունը, հավելելով, որ մարդիկ այդ նավակով փորձում էին հասնել հունական Լեսբոս կղզի։

Նավակում եղել է 46 փախստական, այդ թվում 8 կին եւ 7 երեխա։ Նավակը ծով է դուրս եկել Այվանջիկի շրջանից։
Ափից 2 մղոն հեռավորության վրա նավակի շարժիչը շարքից դուրս է եկել, որից հետո փոթորիկը սկսել է ջրով լցնել նավակը։ Առափնյա ծառայության նավակներով հնարավոր է եղել փրկել 45 մարդու։ Նրանք Սիրիայի, Աֆղանստանի, Կոնգոյի, Եթովպիայի, Էրիթրեայի, Բանգլադեշի եւ Կամերունի քաղաքացիներ են։

Մի եթովպացի կին համարվում է անհետ կորած, նրա որոնումները շարունակվում են։