Թուրքիան Ռուսաստանի ռազմավարական գործընկերն է. Կրեմլ

Ռուսաստանը գնահատում է ամենաբարդ խնդիրները լուծելու համար փոխզիջում գտնելու՝ Թուրքիայի կամքը. ասել է ՌԴ նախագահի մամուլի քարտուղար Դմիտրի Պեսկովը: Այս մասին հայտնում է ՌԻԱ «Նովոստի»-ն:

Լրագրողները Պեսկովին հարցրին, թե ինչպես է Ռուսաստանի նախագահ Վլադիմիր Պուտինը  տեսնում ռուս-թուրքական հարաբերությունները, և արդյո՞ք Թուրքիան Ռուսաստանի գլխավոր դաշնակիցներից մեկն է:

«Իհարկե, Թուրքիան Ռուսաստանի Դաշնության շատ կարևոր գործընկերն է՝ Ռուսաստանի Դաշնության ռազմավարական գործընկեր»,- պատասխանել է Պեսկովը:

Ռուսաստանի Դաշնության նախագահի մամուլի քարտուղարը հստակեցրել է, որ երկու երկրները սերտ փոխգործակցություն ունեն տարածաշրջանային գրեթե բոլոր հարցերի շուրջ, մասնավորապես` Ղարաբաղի հարցով ռուս-թուրքական մոնիտորինգի կենտրոնի աշխատանքի վերաբերյալ:

«Գիտեք, որ Սիրիայի շուրջ փոխգործակցությունը շատ ակտիվ է, և չնայած Սիրիայում տեղի ունեցած դժվար պահերին, երկու նախագահներին միշտ էլ հաջողվել է փոխզիջում գտնել,- հավելել է Պեսկովը:- Մենք շատ բարձր ենք գնահատում նույնիսկ մեր գործընկերների՝ փոխզիջում գտնելու քաղաքական կամքը դժվար իրավիճակներում»: