Հունաստանը պահանջել է Սուրբ Սոֆիա տաճարին վերադարձնել թանգարանի կարգավիճակը

Ստամբուլի Սուրբ Սոֆիային (Այա Սոֆիա-Հաջիա Սոֆիա) պետք է վերադարձվի թանգարանի կարգավիճակը. ասել է Հունաստանի արտգործնախարար Նիկոս Դենդիասը՝ չորեքշաբթի ելույթ ունենալով ՄԱԿ-ի Մարդու իրավունքների խորհրդի 46-րդ նստաշրջանում. հաղորդում է ՌԻԱ «Նովոստի»-ն:

«Ես կցանկանայի անդրադառնալ Հունաստանի համար հատկապես կարևոր մի խնդրի` մշակութային իրավունքների լիարժեք պահպանմանը: Բոլոր պետությունները պարտավոր են, անկախ իրենց քաղաքական, տնտեսական, մշակութային համակարգերից, զերծ մնալ մշակույթի հուշարձանների կարգավիճակի փոփոխությունից»,- ասել է Դենդիասը:

Ըստ նրա՝ շահագրգիռ համայնքների կողմից նախնական համաձայնություն ստանալը և բոլոր շահագրգիռ կողմերի նախնական ծանուցումը, ներառյալ՝ՄԱԿ-ի համապատասխան մարմինների, ինչպիսիք են ՅՈՒՆԵՍԿՕ-ն, անփոխարինելի պայման է:

«Ի միջի այլոց, ես նկատի ունեմ Սուրբ Սոֆիայի հուշարձանը մզկիթի վերածելը, ինչը հակասում է մշակութային ժառանգության նկատմամբ հարգանքի ցանկացած հասկացությանը: Այլ միջազգային կազմակերպությունների և հաստատությունների հետ մենք խնդրում ենք վերադարձնել այս հուշարձանին նախկին կարգավիճակը»,- ասել է Հունաստանի ԱԳՆ ղեկավարը:

2020-ի հուլիսին Թուրքիայի պետական խորհուրդը չեղյալ համարեց 1934-ի որոշումը Սբ Սոֆիան մզկիթը թանգարան դարձնելու մասին: Դրանից անմիջապես հետո նախագահ Ռեջեփ Թայիփ Էրդողանը հայտարարեց, որ ինքը հրամանագիր է ստորագրել տաճարը մզկիթի վերածելու և այնտեղ մուսուլմանական ծիսակարգեր իրականացնելու մասին: Առաջին աղոթքը Սուրբ Սոֆիայում կատարվել է հուլիսի 24-ին: