Քյարամյանն ու ԱԱԾ 30 աշխատակից ապահովել են բունկերում գեներալների վրա բղավող Աննա Հակոբյանի անվտանգությունը. Արամ Գաբրելյանով

29-ամյա Արգիշտի Քյարամյանը Արցախ է ժամանել ԱԱԾ 30 աշխատակիցների հետ։ Գլխավոր խնդիրը, որ ՀՀ ԱԱԾ ղեկավարի առջեւ դրել էր Փաշինյանը, իր կնոջ եւ որդու անվտանգությունը պահպանելն էր: Դերերը բաշխվել են հետեւյալ կերպ՝ բացի Աննա Հակոբյանի անձնական պահպանությունից, նրա անվտանգությունն ապահովել են եւս 10՝ ամբողջությամբ զինված հատուկ ջոկատայիններ: Նույնիսկ Ղարաբաղում զարմացել են, թե ինչ զենքերով են ժամանել ԱԱԾ աշխատակիցները: Եվս 10 մարդ պահպանել է Փաշինյանի որդու անվտանգությունը: Մնացածը գտնվել են Արգիշտիի տրամադրության տակ: Այս մասին  իր Telegram-ալիքում գրել է «Իզվեստիա» թերթի տնօրենների խորհրդի նախագահ Արամ Գաբրելյանովը:

«Սկանդալ է ծագել, երբ գեներալ Մովսես Հակոբյանը կոշտ տոնով փորձել է Նիկոլի կնոջից պահանջել լքել բունկերը, որում գերգաղտնի ռազմական օպերացիա էր քննարկվում։ Մինչ այդ արդեն մի քանի անգամ Աննա Հակոբյանը հրապարակավ նրանց վիրավորել է եւ անգամ փորձել սովորեցնել, թե ինչպես պետք է կառավարել զորքը։ Մովսես Հակոբյանը չի դիմացել եւ շատ կոպիտ ձեւով նրանից պահանջել է լքել շտաբը:

Կնոջ հետ զրույցից 5 րոպե անց Փաշինյանը զանգել է Քյարամյանին եւ պահանջել ձերբակալել գեներալ Հակոբյանին ու ձեռնաշղթաներով բերել Երեւան։ Հենց նման պահանջ է եղել՝ բերել ձեռնաշղթայով ու ոստիկանական մեքենայով։

Քյարամյանը պատիվ է տվել եւ գնացել Արցախի նախագահի մոտ: Վախեցած Արայիկ Հարությունյանը երկու գեներալների հրավիրել է խորհրդակցության: Գեներալներն ասել են, որ ոչ ոք նման հրաման չի կատարի, եւ, հակառակը, կձերբակալվեն Քյարամյանն ու նրա ողջ թիկնազորը։ Այդ ժամանակ Արայիկ Հարությունյանը հրաժարվել է կատարել Փաշինյանի հրամանն ու այդ մասին ասել է Արգիշտիին։ Վերջինս դողացող ձայնով զեկուցել է Նիկոլին, որ անհնար է կատարել գեներալ Հակոբյանին ձերբակալելու հրամանը: Փաշինյանը սկսել է գոռալ ԱԱԾ երիտասարդ ղեկավարի վրա ու նրան մեղադրել, որ նա տղամարդ չէ։ Դրանից հետո պատերազմող երկրի ԱԱԾ տնօրենի ազատման հրամանն է արձակել»,- գրել է Գաբրելյանովը: