Իրանն ունի բոլոր անհրաժեշտ միջոցները թշնամիներին պարտության մատնելու համար. ԻՀՊԿ հրամանատար

Իրանի «Իսլամական հեղափոխության պահապանների կորպուսի» հրամանատար, գեներալ-մայոր Հոսեյն Սալամին հայտարարել է, որ Իրանը տիրապետում է այն ամենին, ինչ անհրաժեշտ է հակառակորդներին պարտության մատնելու համար:

Ինչպես հայտնում է «Թանսիմ» գործակալությունը, այս մասին ԻՀՊԿ հրամանատարը հայտնել է իրանցի նահատակների ոգեկոչմանը նվիրված միջոցառմանը, որն անցկացվել է հինգշաբթի:

«Մեր տիրապետության տակ եզակի գործիքներ կան»,- հավելել է իրանցի գեներալը՝ խորհուրդ տալով «երկրի թշնամիներին հրաժարվել իրենց ճղճիմ երազանքներից և հեռու մնալ Իրանի ժողովրդից»:

«Թշնամիների բոլոր երազանքներն ու նպատակները ձախողվել են: Առավելագույն ճնշման քաղաքականությունը նույնպես տապալվել է Իրանին պաշտպանական հզորություն զարգացնելու հարցում խոչընդոտելու առումով»,- ընդգծել է հրամանատարը:

Վերջինս վերահաստատել է նաև, որ իրանցի գիտնական Մոհսեն Ֆախրիզադեի սպանությունը երբեք չի կանգնեցնի երկրի գիտական առաջընթացը:

Հիշեցնենք, որ իրանցի ֆիզիկոս-միջուկայնագետը, որն աշխատելիս է եղել Իրանի ՊՆ-ին կից նորարարությունների և հետազոտությունների կենտրոնում, սպանվել է նոյեմբերի 27-ին: