Կասկածներ կան, որ Ադրբեջանը չի տրամադրում հայ ռազմագերիների իրական թիվը. Արա Այվազյան

Հայկական կողմը կասկածներ ունի, որ Ադրբեջանը չի տրամադրում հայ ռազմագերիների իրական թվերը: Այս մասին ֆրանսիական «Le monde» օրաթերթին տված հարցազրույցում ասել է ՀՀ արտաքին գործերի նախարար Արա Այվազյանը:

«Կազմվել են նախնական ցուցակներ: Երկու երկրների միջև սկզբունքային համաձայնություն է ձեռք բերվել՝ «բոլորը բոլորի դիմաց» դրույթով փոխանակման վերաբերյալ: Չէի ցանկանա ճշգրիտ թվեր  նշել, քանի որ կասկածներ կան, որ Ադրբեջանը չի տրամադրում  հայ ռազմագերիների իրական թիվը, և որ նրանք կարող են շատ ավելին լինել։ Այնուամենայնիվ, անհրաժեշտ է այս խնդրին հրատապ լուծում գտնել, քանի որ ապացուցված  է, որ հայ ռազմագերիները և պատանդի կարգավիճակում հայտնված քաղաքացիական անձինք անմարդկային վերաբերմունքի են արժանանում»,- ասել է Այվազյանը:

Նախարարը նշել է, որ հայկական կողմն աշխատում է իր գործընկերների, մասնավորապես՝ Կարմիր խաչի միջազգային կոմիտեի հետ, որպեսզի ապահովի գերիների անհապաղ վերադարձը:

«Հայտնի  է, որ նոյեմբերի 9-ի զինադադարի հայտարարությունը վերջնաժամկետ չի սահմանում, և  Բաքուն օգտագործում է տվյալ հանգամանքը՝ խնդիրը շահարկելու, ռազմագերիների և պատանդի կարգավիճակում հայտնված քաղաքացիական անձանց հանդեպ անմարդկային վերաբերմունք ցուցաբերելու, ինչպես  նաև  Հայաստանի ներքաղաքական իրավիճակի վրա ազդելու համար»,- նշել է Արա Այվազյանը:

Ավելի վաղ էլ Արցախի մարդու իրավունքների պաշտպանն էր ահազանգել, որ Ադրբեջանը թաքցնում է հայ ռազմագերիների իրական թիվը: Ըստ Արտակ Բեգլարյանի` կան հիմնավոր ապացույցներ, որ հակառակորդ երկիրը ոչ բոլոր ռազմագերիներին է վերադարձրել հայրենիք: Այս ուղղությամբ Արցախի օմբուդսմանն աշխատում է համապատասխան մարմինների հետ: