ՈՒՂԻՂ․ Ո՛չ բանակը, ո՛չ ներքին զորքերը, ո՛չ էլ ԱԱԾ-ն այս երկիրը զիջած ղեկավարին չեն հետևելու․ Իշխան Սաղաթելյան

Մի քանի ժամվա ընթացքում ո՛չ բանակը, ո՛չ ներքին զորքերը, ո՛չ էլ ԱԱԾ-ն այս երկիրը զիջած, թուրքի դեմը կզած ղեկավարին չեն հետևելու. ըստ Yerkir.am-ի՝ ասաց ՀՅԴ Հայաստանի ԳՄ ներկայացուցիչ Իշխան Սաղաթելյանը 17 կուսկացությունների հրավիրած հանրահավաքի մեկնարկին, երբ ոստիկանական ուժերը փորձում էին ցրել ցուցարարներին։

«Փաշինյանի լուծումն ընդունելի է միայն Ադրբեջանի համար»,- նշեց նա՝ հիշեցնելով, որ Նիկոլ Փաշինյանը 2 ու կես տարի ասում էր՝ ես պետք է գտնեմ լուծում, որն ընդունելի լինի Արցախի ժողովրդի, Հայաստանի ժողովրդի և Ադրբեջանի ժողովրդի համար։

«Սա կուսակցական պայքար չէ, սա իշխանության համար պայքար չէ, սա երկիրը փրկելու ծրագիր է։ Նիկոլ Փաշինյանը քաղաքացիական անձանց զինել է պրովոկացիաներ անելու, երկրում քաղաքացիական բախումներ հրահրելու համար։ Նիկոլ Փաշինյանն ամեն ինչի ընդունակ է այսքան զոհերից, կորուստներից հետո իր դավաճանական գործունեությունը Երևանում շարունակելու համար։ Դրա համար խնդրում եմ մեր քաղաքացիներին՝ սադրանքների չտրվել»,- հայտարարեց Իշխան Սաղաթելյանը։

Նա նշեց, որ մենք զիջելու հայրենիք չունենք, իսկ հայրենիք զիջած ղեկավարը պետք է հեռանա, որպեսզի փրկենք մեր երկիրը։

«Մենք կապիտուլյացիան չենք ընդունելու։ Մենք մեր երկիրը չենք զիջելու։ Հայաստանի նորանկախ պատմության մեջ Արցախը մեր ամենամեծ ձեռքբերումն է եղել, հայ ժողովրդի հպարտության ու արժանապատվության հարցն է եղել, մենք մեր ինքնասիրությունն ու արժանապատվությունը չենք զիջելու»,- ասաց ՀՅԴ Հայաստանի ԳՄ ներկայացուցիչը։

Նա հայտարարեց, որ սա ազգային ազատագրական պայքար է, և վերջ։

Հանրահավաքի մասնակիցները վանկարկում էին՝ «Նիկո՛լ, դավաճա՛ն»։

Նշենք, որ, զուգահեռաբար, բերման են ենթարկվում ՀՅԴ և մյուս կուսակցությունների անդամ ցուցարարները։

Մանրամասն՝ ուղիղ հեռարձակմամբ: