Լիրայի ռեկորդային անկման ֆոնին` Էրդողանը փոխարինել է Թուրքիայի Կենտրոնական բանկի ղեկավարին

Թուրքիայի նախագահ Ռեջեփ Թայիփ Էրդողանը, ազգային արժույթի ռեկորդային անկման ֆոնին, աշխատանքից ազատել է երկրի Կենտրոնական բանկի ղեկավար Մուրատ Ույսալին: Համապատասխան հրամանագիրը շաբաթ օրը հրապարակվել է կառավարության Resmi Gazete պաշտոնական թերթում:

«Հանրապետության կենտրոնական բանկի ղեկավար Մուրատ Ույսալը, օրենսդրության համաձայն, ազատվում է զբաղեցրած պաշտոնից»,- ասվում է հաղորդագրության մեջ:

Ըստ փաստաթղթի` «այսուհետ Կենտրոնական բանկի ղեկավարի պաշտոնը կզբաղեցնի Նաջի Աղբալը»: Նա նախկինում զբաղեցնում էր նախագահի աշխատակազմի ռազմավարական և բյուջետային վարչության պետի, ինչպես նաև Թուրքիայի ֆինանսների նախարարի պաշտոնը (2015-2018թթ.):

Թուրքական արժույթը երեքշաբթի թարմացրել էր իր ռեկորդային ցածր մակարդակը՝ 1 դոլարի դիմաց կազմելով 8,49 լիրա՝ անցնելով նախորդ նվազագույնից (1 դոլարի դիմաց 8,34 լիրա), որը գրանցվել էր հոկտեմբերի 30-ին:

Ավելի վաղ Bloomberg գործակալությունը թուրքական ազգային արժույթի արժեզրկումը կապում էր այն մտավախությունների հետ, որ Անկարան կարող է ներքաշվել Արցախում Ադրբեջանի և Հայաստանի միջև հակամարտության մեջ: