ՌԴ ԱԳՆ փոխնախարարը խոսել է ԵԱՀԿ Մինսկի խմբի նոր մշակումների մասին

Լեռնային Ղարաբաղի հակամարտության կարգավորման գործընթացում կան որոշակի մշակումներ, որոնք արվել են ԵԱՀԿ Մինսկի խմբի շրջանակներում, և դա է, որ այժմ քննարկվում է. լրագրողներին ասել է ՌԴ փոխարտգործնախարար Անդրեյ Ռուդենկոն:

«Դեռևս կան բավականին հստակ մշակումներ (Լեռնային Ղարաբաղի հակամարտության կարգավորման համար), որոնք կատարվել են ԵԱՀԿ Մինսկի խմբի շրջանակներում, այժմ քննարկվում է հենց դա»,- ասել է նա:

Ռուդենկոն շեշտել է, որ Մոսկվան հանդես է գալիս Ղարաբաղում քաղաքական կարգավորման օգտին: «Մենք միանշանակ ելնում ենք այն բանից, որ այս հակամարտությունը չի կարող ունենալ ռազմական լուծում, լուծումը պետք է լինի քաղաքական, համապարփակ՝ հաշվի առնելով բոլոր շահագրգիռ կողմերի շահերը»,- նշել է ՌԴ փոխարտգործնախարարը:

Նա նաև հավելել է, որ դեռ վաղ է խոսել Ադրբեջանի ու Հայաստանի ղեկավարների հանդիպման մասին:

«Մենք բանակցություններ ենք վարում փորձագիտական մակարդակով, առաջին հերթին՝ Մինսկի խմբի շրջանակներում, այլ բանի մասին խոսելը դեռ վաղ է»,- նշել է Ռուդենկոն:

Նրա խոսքով՝ Մոսկվան «նախընտրում է շահարկումներ չանել Ղարաբաղի կարգավորման հարցում»: