Մակրոնը ԼՂ հարցով զանգահարել է Պուտինին

Ռուսաստանի և Ֆրանսիայի նախագահներ Վլադիմիր Պուտինն ու Էմանուել Մակրոնը քննարկել են իրավիճակը Լեռնային Ղարաբաղում. հայտնում է Կրեմլի մամուլի ծառայությունը` նշելով, որ հեռախոսազրույցը նախաձեռնել էր ֆրանսիական կողմը։

Հաղորդագրությունում, մասնավորապես, ասվում է. «Զրույցի ընթացքում ռուս և ֆրանսիացի առաջնորդները հանգամանալից քննարկել են հայ-ադրբեջանական հակամարտությունը և խորին մտահոգություն արտահայտել շարունակվող լայնամասշտաբ մարտական գործողությունների պատճառով»:

Նշվում է նաև, որ երկու պետությունների ղեկավարներն էլ համակարծիք են, որ հակամարտության կարգավորումը պետք է լինի միայն քաղաքական-դիվանագիտական մեթոդներով։

Պուտինն ու Մակրոնը քննարկել են հետագա փոխգործակցության կոնկրետ պարամետրեր, նախ և առաջ՝ ԵԱՀԿ ՄԽ ձևաչափում։ Նրանք պատրաստակամություն են հայտնել հանդես գալու Մինսկի խմբի համանախագահների համատեղ հայտարարությամբ՝ հօգուտ զինված առճակատման անհապաղ դադարեցման։