Մերկելն Ազովի ծովում կատարվածից հետո զանգահարել է Պուտինին

Գերմանիայի կանցլեր Անգելա Մերկելը և ՌԴ նախագահ Վլադիմիր Պուտինը հեռախոսազրույց են ունեցել և քննարկել Ազովի ծովում ստեղծված իրավիճակը. հայտնում է Կրեմլի պաշտոնական կայքը:

Զրույցը կայացել է գերմանական կողմի նախաձեռնությամբ: Պուտինը մտահոգություն է հայտնել Կիևի` ռազմական դրություն սահմանելու որոշմամբ: Նա նշել է, որ այդ ամենն արվում է` Ուկրաինայում նախընտրական արշավը հաշվի առնելով: Պուտինը նաև հույս է հայտնել, որ Բեռլինը կկարողանա համոզել Ուկրաինային` զերծ մնալ չմտածված քայլերից:

Կիրակի ուկրաինական մի քանի նավեր հատել են ՌԴ-ի սահմանը: Դրանք մտել են ռուսական` ժամանակավորապես փակ ջրատարածք և չեն ենթարկվել ռուսական կողմի նախազգուշացումներին: Ռուսական կողմը կրակ է բացել, վիրավորվել է 3 ուկրաինացի զինվորական, նրանց բժշկական օգնություն են ցույց տվել, կյանքին սպառնացող վտանգ չկա: Նավերը ձերբակալվել են:

ՌԴ-ն քրեական գործ է հարուցել և ՄԱԿ-ի Անվտանգության խորհրդի շտապ նիստ հրավիրել Ազովի ծովում ստեղծված իրավիճակի հետ կապված: