Ինչպե՞ս է իրեն զգում կորոնավիրուսով վարակված Բեռլուսկոնին. բժիշկը մանրամասներ է հայտնել

Իտալիայի նախկին վարչապետ Սիլվիո Բեռլուսկոնին նոր կորոնավիրուսային վարակի «ամենանուրբ» փուլում է. Associated Press-ի տեղեկացմամբ՝ հայտարարել է Միլանի Սան Ռաֆայել հիվանդանոցի ինտենսիվ թերապիայի բաժանմունքի վարիչ Ալբերտո Զանգրիլոն:

«Պացիենտն «օպտիմալ» է արձագանքում բուժմանը, իսկ բժիշկները նրա ապաքինման հարցում պահպանում են զգուշավոր լավատեսությունը»,- հստակեցրել է բժիշկն ու նշել՝ Բեռլուսկոնին հիվանդների առավել խոցելի խմբում է:

Զանգրիլոյի խոսքով՝ նախկին վարչապետը մոտ ապագայում դուրս չի գրվի հիվանդանոցից, քանի որ հիվանդության բուժումը ժամանակ է պահանջում:

Հիշեցնենք՝ կորոնավիրուսով վարակված իտալացի քաղաքական գործիչ Սիլվիո Բեռլուսկոնին հոսպիտալացվել է Միլանում. նրա մոտ երկկողմանի թոքաբորբի առաջին նշաններ կան: