Իվանիշվիլին որոշել է հաշտվել աբխազների ու օսերի հետ և «միավորել Վրաստանը»

Վրաստանի նախկին վարչապետ, իշխող «Վրացական երազանք» կուսակցության հիմնադիր և նախագահ Բիձինա Իվանիշվիլին առաջ է քաշել  աբխազներին ու օսերին «դեպի իրենց կողմը շրջելու» համար «բոլոր լծակների կիրառման» գաղափարը. տեղեկացնում է yerkir.am-ը` EADaily-ին հղումով:

«Մենք պետք է  միավորենք Վրաստանը և դրա համար կիրառենք բոլոր միջազգային լծակները: Խաղաղությամբ, վստահության, հաշտեցման և հարգանքի վերականգնման միջոցով մենք պետք է դեպի մեզ շրջենք մեր աբխազ ու օս եղբայրներին»,- ասել է նա` ելույթ ունենալով Կոջորիում  մեծամասնականով առաջադրված պատգամավորներին ներկայացնելու ժամանակ:

Իվանիշվիլին նշել է, որ երկիրը ծանր ժամանակներ է ապրում և բարդ տարածաշրջանում է:

«Այդ պատճառով պարտավոր ենք առավելագույնս նվազեցնել ռիսկերը, որպեսզի խուսափենք բոլոր հնարավոր սադրանքներից, որոնք կարող են վնաս հասցնել երկրի կայունությանն ու խաղաղ զարգացմանը»,- ասել է նա:

Իվանիշվիլին նաև շնորհակալություն է հայտնել Վրաստանի ռազմավարական գործընկերներին` ԵՄ-ին ու ԱՄՆ-ին, աջակցության համար:

Ներքաղաքական հարցերին անդրադառնալով` Իվանիշվիլին հայտարարել է, որ ճգնաժամը ցույց է տվել` երկրի ղեկավարումը հուսալի ձեռքերում է, իսկ «Վրացական երազանքի» կառավարությունը «խաղաղության ու կայունության երաշխավորն է»: