Վրաստանը ճամփաբաժանի առաջ է կանգնած. Իվանիշվիլին կոչով դիմել է ժողովրդին

Վրաստանում իշխող «Վրացական երազանք» կուսակցության հիմնադիր և ղեկավար Բիձինա Իվանիշվիլին նախագահական ընտրությունների երկրորդ փուլից առաջ դիմել է ժողովրդին և կոչ արել, որ ոչ մի դեպքում չքվեարկեն հակառակորդների օգտին, քանի որ Վրաստանը կանգնած է ճամփաբաժանի առաջ. հայտնում է Грузия-Онлайн-ը:

Նա նշել է, որ հասկանում է, որ բնակչությունը դժգոհ է շատ սխալներից, սակայն այսօր, ըստ նրա,  կարևոր է այն, որ հայրենիքը կանգնած է պատմական ճամփաբաժանի առաջ, և կա սխալ որոշում կայացնելու մեծ վտանգ:

Իվանիշվիլին իր նախընտրական ուղերձի ժամանակ ոչ  մի անգամ չի հիշատակել նախագահի  թեկնածու Սալոմե Զուրաբիշվիլիի անունը, որին աջակցում է  իշխող կուսակցությունը:

Վրաստանում տեղի է ունենալու նախագահական ընտրությունների երկրորդ փուլը:Սալոմե Զուրաբիշվիլիի հիմնական մրցակիցն է ընդդիմադիր Գրիգոլ Վաշաձեն, որի հաղթանակի հետ մեծ հույսեր  է կապում նրա թիմակից Միխեիլ Սահակաշվիլին. նա ցանկանում է վերադառնալ Վրաստան: