Ինչպե՞ս էր 1945-ին. ԱԴԾ-ն գաղտազերծել է Հաղթանակի առաջին շքերթի փաստաթղթերը

Մոսկվայում անցկացվելիք` Հաղթանակի 75-ամյակին նվիրված շքերթի նախօրեին ՌԴ անվտանգության դաշնային ծառայությունը հրապարակել է արխիվային փաստաթղթեր, որոնք պատմում են, թե ինչպես է անցկացվել Հաղթանակի առաջին շքերթը Կարմիր հրապարակում 1945 թվականի հունիսի 24-ին:

Պատմական փաստաթղթերի թվում է շքերթի անցկացման 20 էջանոց հրահանգը, որում մանրամասն ներկայացված է Կարմիր հրապարակով բոլոր ռազմաճակատների գնդերի, նավատորմի և Մոսկվայի կայազորի զորքերի անցնելու կարգը. ըստ yerkir.am-ի` հայտնում է pravda.ru-ն: 

Արդեն դեղնած թղթերի վրա  Հաղթանակ շքերթի անցկացման բոլոր ծիսակատարություններն ու ավանդույթներն են` ամենայն մանրամասներով:

Ի դեպ, հրահանգում նշված է, որ Լենինի դամբարանի տրիբունայից պետք է խոսք ասեր Իոսիֆ Ստալինը, այլ ոչ թե Գեորգի Ժուկովը:

Հրահանգը հաստատվել է 1945 թվականի հունիսի 12-ին: Նախնական տարբերակում չի եղել այն պահը, որը հետագայում տեղ է գտել բոլոր լուսանկարներում ու տեսաժամանակագրություններում` զինվորները թշնամու զորամիավորումների 200 դրոշ ու շտանդարտ, այդ թվում ` Հիտլերի անձնական շտանդարտն ու Վլասովի բանակի դրոշը, նետում են Լենինի դամբարանի առջև հատուկ կառուցված հարթակին: Ավելի ուշ դրոշներն ու հարթակը այրել են: