Իրանը հերքել է Վենեսուելայից ոսկու արտահանման մասին մեղադրանքները

Այն տեղեկությունները, ըստ որի Իրանը ոսկի է արտահանում Վենեսուելայից, չեն համապատասխանում իրականությանը. այս մասին հայտարարել է Կարակասում Իրանի դեսպան Հոջաթոլլահ Սոլթանին։

Ավելի վաղ ԱՄՆ պետքարտուղար Մայք Պոմպեոն հայտարարել էր, որ Վաշինգտոնը կասկածում է իրանական Mahan Air ավիաընկերությանը Վենեսուելայից ոսկի արտահանելու մեջ։

«Տեղեկություններն առ այն, որ վառելիքի դիմաց Իրանը ստանում է 9 տոննա ոսկի, 100 տոկոսանոց սուտ է, քանզի կան հաշվանցման (քլիրինգ) այլ մեթոդներ՝ օրինակ նավթի դիմաց ապրանքներ, սուրճ, կակաո և այլ ապրանքներ», - Al-Alam հեռուստաընկերության հետ զրույցում նշել է իրանցի դեսպանը։

Նշենք, որ մինչ օրս Վենեսուելա է հասել երեք իրանական լցանավ։ ԱՄՆ-ն բազմիցս է խոչընդոտներ ստեղծել Վենեսուելա ուղևորվող այլ նավերի համար։ Իրանի նախագահ Հասան Ռոհանին հայտարարել էր, որ եթե իրանական լցանավերը, որևէ խնդրի հանդիպեն, ԱՄՆ-ն լուրջ պրոբլեմներ կունենա։