Մայիսյան հերոսամարտերում թրծված ժողովուրդն իր հաղթանակների տերն է․ Դավիթ Իշխանյան

ՀՅԴ Արցախի ԿԿ ներկայացուցիչ, ԱՀ ԱԺ պատգամավոր Դավիթ Իշխանյանը ֆեյսբուքյան իր էջում շնորհավորական ուղերձ է հղել մայիսյան եռատոնի առթիվ։

«Սիրելի հայրենակիցներ, մայիսը մեր պատմության էջերում անխոնջ պայքարի, անկոտրում կամքի ու վճռականությամբ ձեռք բերած հաղթանակների ամիս է: Պատմության այս էջերը ոչ միայն հպարտության զգացում են ծնում, այլև ստիպում են հավատալ, որ այդպիսի հաղթանակներ կերտած ժողովուրդը պետք է միշտ առաջ նայի ու ձգտի նորանոր ձեռքբերումների: Մայիսյան հերոսամարտերում թրծված ժողովուրդն իր հաղթանակների տերն է. հաղթանակներ, որոնք կերտեց իր լավագույն զավակների անձնազոհությամբ ու նվիրումով։

Մայիսյան հաղթանակների պսակը կրող ժողովուրդը նաև գիտակցում է, թե ինչեր կարող է անել միասնականության ուժը և ինչեր կործանել ներքին խռովությունը: Մեր միասնականությունն այսօր էլ երկընտրանք չունի, քանզի ժամանակները փոխվել են, բայց մեր դեմ ծառացած մարտահրավերները՝ ոչ: Մեր լինելիության գլխավոր գրավականները շարունակում են մնալ ամուր պետականությունը, հզոր ու մարտունակ բանակը և այն ամենը, ինչը կարող է բերել հայրենիքի բարգավաճմանը: Շնորհավոր բոլորիս Եռատոնը։

Թող մայիսյան ոգին միշտ թևածի Արցախի երկնակամարում…»։