Մայիսյան հաղթանակների հետ կապված` Ազգային խորհրդի բոլոր որոշումները` Ազգային արխիվում

Մայիսյան հաղթանակների շնորհիվ առաջին անգամ հայկական պետականություն հռչակվեց, և հայերը ցույց տվեցին իրենց միասնականությունը. այսօր լրագրողներին ասաց Ազգային արխիվի տնօրեն Ամատունի Վիրաբյանը:

Ըստ նրա` մայիսյան հաղթանակների կարևոր խորհուրդներից մեկն էլ հրաշքն էր: «Այդ ժամանակաշրջանում ժողովուրդը բավականին թուլացած էր ու մնացել էր առանց ղեկավարության. հայկական ուժերն այլևս չէին դիմադրում: Սակայն հայ ժողովրդի համար առաջին անգամ դրվեց լինել-չլինելու հարցը, և բոլորը մեկ մարդու նման ոտքի կանգնեցին, ու հրաշք տեղի ունեցավ` հաղթեցինք»,- ասաց Վիրաբյանը:

Նրա կարծիքով` միասնականությունը կարևոր գործոն է հաղթանակների համար:

Վիրաբյանը նշեց, որ հայերը Սարդարապատի ճակատամարտին մասնակցում էին` ինչպես կարող էին` ով զենք ուներ` զենքով, ով էլ չուներ, բահով էր կռվում: Ըստ նրա` այսօր հայ ժողովուրդը լիովին ընկալում է մայիսյան հաղթանակների կարևորությունը:

Ի դեպ, Ազգային արխիվի տնօրենը տեղեկացրեց, որ ախրիվում են պահվում Թբիլիսիում գործած ազգային խորհրդի` այդ ժամանակաշրջանի բոլոր փաստաթղթերը: «1917-ի հոկտեմբերից մինչև 1918-ի հուլիսի 18-ի որոշումներն ունենք արխիվում»,- հայտնեց նա: