Աշխարհում էներգակիրների պահանջարկը կնվազի 6%-ով՝ 7 անգամ ավել, քան 2008-ին. ՏԱՍՍ

Կորոնավիրուսի համավարակն էներգաշուկաների համար դարձել է ամենամեծ շոկը Երկրորդ համաշխարհային պատերազմից ի վեր. այս մասին գրում է ՏԱՍՍ-ը՝ Միջազգային էներգետիկ գործակալության (IEA) նոր հետազոտությանը հղումով. հայտնում է Yerkir.am-ը։

Նշվում է՝ պահանջարկն ընկել է էներգիայի աղբյուրների բոլոր տեսակների նկատմամբ՝ նավթ, գազ, ածուխ: Ըստ գործակալության հաշվարկների՝ 2020թ. աշխարհում էներգակիրների պահանջարկը կնվազի 6%-ով, ինչը 7 անգամ ավելի շատ է, քան 2008թ. համաշխարհային ֆինանսական ճգնաժամի ժամանակ:

Բացարձակ արտահայտմամբ՝ անկումը հավասար կլինի այն ծավալին, որը տարեկան օգտագործում է Հնդկաստանը՝ իր մեծությամբ աշխարհում երրորդ շուկան:

Մանրամասնվում է՝ մեծագույն անկումը տեղի կունենա զարգացած շուկաներում: Այսպես, ակնկալվում է, որ ԱՄՆ-ում պահանջարկը կնվազի 9%-ով, Եվրամիությունում՝ 11 %-ով:

Պահանջարկի վրա համավարակի վերջնական արդյունքը հնարավոր կլինի գնահատել կարանտինային միջոցների ավարտից հետո, իսկ մինչ այդ գործակալությունում հաշվարկել են, որ բնակչության մեկուսացման յուրաքանչյուր ամիսը կկրճատի էներգակիրների համաշխարհային պահանջարկը 1,5%-ով:

«Միաժամանակ, սահմանափակող միջոցները հանգեցրել են այլընտրանքային աղբյուրների՝ քամու, արեւի, հիդրո- եւ ատոմային էներգետիկայի նկատելի ավելացմանը»,- պարզաբանում են գործակալությունում: 2020թ. դրանց մասնաբաժինը էներգաարտադրության ընդհանուր կառուցվածքում կարող է հասնել 40%-ի: