Ոստիկանությունն ավելի արագ կհայտնաբերի չնախատեսված տեղերում աղբ թափողներին. նախագիծ

Չնախատեսված վայրում աղբ թափելու համար պատասխանատվության միջոցը կիրառելու իրավասությունը տեղական ինքնակառավարման մարմինների փոխարեն առաջարկվում է վերապահել ՀՀ ոստիկանությանը։

Այս մասին տեղեկանում ենք e-draft իրավական ակտերի նախագծերի հրապարակման միասնական կայքից։

«Ներկայումս տվյալ վարչական իրավախախտումների վերաբերյալ գործերը քննելու և վարչական տույժ նշանակելու իրավասությունը վերապահված է տեղական ինքնակառավարման մարմիններին։ Հաշվի առնելով այն հանգամանքը, որ սույն վարչական իրավախախտման հետ կապված գործերը քննում և պատասխանատվության միջոցը կիրառում է ՀՀ ոստիկանությունը՝ երկակի վարչարարությունից խուսափելու նպատակով Ոստիկանությունն առաջարկում է այն հանել տեղական ինքնակառավարման մարմինների իրավասությունից»,- նշված է Ոստիկանության կողմից մշակված նախագծում։

ՀՀ մարզերում և Երևան քաղաքում վերջին հինգ տարում չնախատեսված վայրում աղբ թափելու վերաբերյալ իրականացվել է ընդհանուր առմամբ 4033 վարույթ, ինչի արդյունքում նշանակված տուգանքների ընդհանուր չափը կազմել է 81.559.000 ՀՀ դրամ:

Մասնավորապես, Երևան քաղաքում իրականացվել է 3 990 վարույթ, որի արդյունքում նշանակված տուգանքների ընդհանուր չափը կազմել է 79.789.000 ՀՀ դրամ, իսկ մարզերում իրականացվել է 43 վարույթ, որի արդյունքում նշանակված տուգանքների ընդհանուր չափը կազմել է 1.770.000 ՀՀ դրամ, ընդ որում, մարզերից չորսում որևէ վարույթ չի հարուցվել:

Նախագծի ընդունմամբ ակնկալվում է նվազեցնել չնախատեսված տեղերում և վայրերում աղբ թափելու պրակտիկան՝ կիրառելով պատասխանատվության առավել գործուն ու կանխիչ մեխանիզմ: Այն հնարավորություն կտա ավելի արագ հայտնաբերելու վարչական իրավախախտումը և բարձրացնելու հասարակության իրավագիտակցությունը շրջակա միջավայրը մաքուր պահելու հարցում: