Մեծ Բրիտանիայում կորոնավիրուսով վարակվածներին որոնելու են հատուկ վարժեցված շները

Բրիտանացիները պատրաստվում են  կորոնավիրուսով վարակվածներին որոնել հատուկ վարժեցված  շների միջոցով.  տեղեկացնում է Yerkir.am-ը`  գերմանական Bild պարբերականը վկայակոչելով:

Այդպիսի հնարավորությանը հավատում է  Լոնդոնի համալսարանի հիվանդությունների վերահսկողության բաժնի ղեկավար Ջեյմս  Լոգանը:

Կորոնավիրուսի թեստերը չեն բավականացնում, և Medical Detection Dogs կազմակերպությունն արդեն սկսել է  վարժեցնել շներին: Կազմակերպության մասնագետ Ռոբ Հարիսի խոսքով` իրենք արդեն ունեն այլ մահացու հիվանդությունների դեմ պայքարի դրական փորձ: «Վերջին 13 տարիների ընթացքում շներին վարժեցրել ենք, որ մի շարք հիվանդություններ տարբերակեն, մասնավորապես` պրոստատիտ ու միզուղիների քաղցկեղ, Պարկինսոնի հիվանդություն, նաև` մալարիա»,- հայտնել է նա:

Ըստ կազմակերպության մասնագետների` երբ շներն արդեն կարողանան հստակ ճանաչել կորոնավիրուսով վարակվածներին, նրանց կարելի է գործի դնել հասարակական վայրերում. 5 շնից բաղկացած խումբը կարող է օրական 4,5 հազար մարդ ստուգել: