Էրդողանը շահագործում է փախստականներին, դա անազնիվ է. Ավստրիայի կանցլեր

ԵՄ-ն պետք է համատեղ ճնշում գործադրի Թուրքիայի նախագահ Ռեջեփ Թայիփ Էրդողանի վրա, որպեսզի վերջինս չկարողանա օգտագործել փախստականներին իր քաղաքական նպատակների համար. այս մասին, ըստ Yerkir.am-ի, հայտարարել է Ավստրիայի կանցլեր Սեբաստիան Կուրցը:

Ըստ կանցլերի՝ այն փախստականները, որոնք հայտնվել են Հունաստանի հետ սահմանին, անմիջապես չեն փախչում Սիրիայից, այլ երկար տարիներ ապրում են Թուրքիայում: Կուրցը նշում է, որ Էրդողանը հատուկ է կազմակերպել այս ակցիան. տրամադրվել են ավտոբուսներ, նախապես տեղեկացվել են փախստականները:

«Նախագահ Էրդողանը այս իրավիճակում օգտագործում է մարդկանց որպես խաղային գնդակ, զենք և ԵՄ-ի վրա ճնշման գործիք: Դա անազնիվ է և պետք է կտրականապես դատապարտվի», - Կուրցի խոսքերն է մեջբերում «ՌԻԱ Նովոստին»:

Հիշեցնենք, որ ԵՄ-ն Թուրքիայի հետ 2016 թ. համաձայնության էր եկել փախստականների հարցում: Ըստ դրա՝ ԵՄ-ն մի քանի միլիարդ եվրոյի օգնություն էր ցուցաբերում Թուրքիային՝ փախստականների հարցը կարգավորելու համար: