Զինվորնե՛ր, հրամայում եմ ձեզ՝ մեռնել. Էրդողանը կրկնել է Աթաթուրքի խոսքերը

Թուրքիայի նախագահ Ռեջեփ Թայիփ Էրդողանը երեկ իր կողմնակիցների հետ հանդիպման ժամանակ անդրադարձել է երկրի գլխավոր ընդդիմադիր, քեմալական Հանրապետական-ժողովրդական կուսակցության առաջնորդ Քեմալ Քըլըչդարօղլուի՝ երկրի իշխանությունների հասցեին ուղղված քննադատություններին: Քըլըչդարօղլուն վերջին շրջանում Սիրիայում թուրքական բանակի մարտական կորուստների վերաբերյալ հայտարարել էր, որ Էրդողանն անտեղի մահվան է ուղարկում թուրքերին. հայտնում է Yerkir.am-ը:

«Ղազի (հանուն իսլամի և Թուրքիայի կռվողներին տրվող պատվանուն) Մուսթաֆա Քեմալ Աթաթուրքը Չանաքքալեում ի՞նչ էր ասում մեր զինվորներին: Ասում էր՝ «Ես ձեզ հրամայում եմ մահանալ»: Քեմա՛լ բեյ, դու նախ և առաջ քո կուսակցության անցյալին ծանոթացիր: Մենք այդ զոհերը տվել ենք Բադրում, Ուհուդում, Հունայնում, Խանդաքում (հանուն իսլամի մղված կռիվներ 7-րդ դարում), Սելջուկների և Օսմանյանների ժամանակ, և սրանից հետո էլ ենք շարունակելու տալ Քեմալ բեյ», - Էրդողանի խոսքերն է մեջբերում «Անադոլու» գործակալությունը: