Գարո Փայլանը պահանջել է «գյավուր» բառի համար Էրդողանին նախազգուշացում տալ

Թուրքիայի խորհրդարանի՝ քրդական Ժողովուրդների դեմոկրատական կուսակցության հայ պատգամավոր Գարո Փայլանը միջնորդություն է ներկայացրել  Թուրքիայի Ազգային մեծ ժողովի նախագահությանը՝ Էրդողանին «գյավուր» բառի համար նախազգուշացում տալու պահանջով. այս մասին Yerkir.am-ը տեղեկանում է Evrensel.net կայքից:

Երեկ Թուրքիայի իշխող Արդարություն և զարգացում կուսակցության խորհրդարանական խմբակցության ժողովի ժամանակ Էրդողանը հայտարարել էր. «Դուք կարող եք այս ազգին ցավեցնել՝ գողանալով գյավուրի (անհավատի) թուրը, բայց երբեք չեք կարող կոտրել պայքարի վճռականությունը»:

Փայլանը նշում է, որ Էրդողանը թիրախավորելով ոչ մուսուլմաններին, թշնամական և խտրական վերաբերմունք է ցուցադրում, իսկ «գյավուր» բառը նվաստացնող, թշնամություն և խտրականություն պարունակող բառ է:

«Անընդունելի է, որ երկրի նախագահն ու կուսակցության ղեկավարը, թիրախավորի նաև քրիստոնեական համայնքը, որի անդամն եմ համարվում նաև ես», - նշում է Փայլանը՝ պահանջելով նախազգուշացում տալ երկրի առաջնորդին: