Կարո Փայլանը Թուրքիայի ԱԳՆ-ից բացատրություն է պահանջել՝ Հայաստանի հետ հակամարտության հարցում Ադրբեջանին սատարելու համար

Քրդամետ Ժողովուրդների դեմոկրատական կուսակցության (HDP) թուրք պատգամավոր Կարո Փայլյանը խորհրդարանում հարցեր է ուղղել երկրի արտաքին գործերի նախարար Մեվլյութ Չավուշօղլուին՝ կապված հայ-ադրբեջանական վերջին սրացումների ժամանակ Ադրբեջանին աջակցելու Անկարայի պատրաստակամության մասին:

Ըստ Փայլանի՝ Թուրքիան ԵԱՀԿ Մինսկի խմբի անդամ է և, հետևաբար, պետք է չեզոք մնա:

Փայլանը հետևյալ հարցադրումներն է հղել Թուրքիայի արտաքին գործերի նախարարության ղեկավարին.

- Արդյո՞ք հայ-ադրբեջանական հակամարտության համատեքստում ցուցաբերում եք կողմնակալ դիրքորոշում՝ ելնելով էթնիկական պատճառներից:

- Դեռ չե՞ք հասկացել, որ ռասիստական արտաքին քաղաքականությունը «բենզին է լցնում» և միայն խնդիրներ է ավելացնում:

-Արդյո՞ք թուրքական ռազմարդյունաբերական համալիրը պլանավորում է ավելացնել Ադրբեջանին զենքի վաճառքի ծավալները:

-Այս պատճառով ե՞ք, դուք բարձրացնում եք լարվածությունը:

-Մտածում եք Ադրբեջան զորք ուղարկելու մասին:

-Ինչու՞ է Թուրքիան առաջնորդվում արտաքին քաղաքականության մեջ էթնիկական նախասիրություններով:

- Երբեմն հիշո՞ւմ եք, որ Թուրքիան ԵԱՀԿ Մինսկի խմբի անդամ է, որը ստեղծվել է Հայաստանի և Ադրբեջանի միջև հարաբերությունների լարվածությունը մեղմելու համար:

- Դեռ չե՞ք հասկացել, որ Կովկասի ապակայունացումը ձեռնտու է միայն Ռուսաստանին:

-Ինչպե՞ս կմեկնաբանեք Ադրբեջանի պաշտպանության նախարարության սպառնալիքը հայ-թուրքական սահմանային գոտում տեղակայված ատոմակայանի վրա հարված հասցնելու պատրաստակամության մասին։