Կարո Փայլանը կդիմի ՄԻԵԴ՝ «ցեղասպանություն» բառի պատճառով իր դեմ կայացված անարդար որոշման համար

Թուրքիայի Սահմանադրական դատարանն այս շաբաթ մերժել էր քրդամետ Ժողովուրդների դեմոկրատական կուսակցության հայ պատգամավոր Կարո Փայլանի հայցը խորհրդարանում նրա ելույթի խոսքերն արձանագրություններից հանելու և «ցեղասպանություն» բառն օգտագործելու համար նրան մեջլիսի երեք նիստի մասնակցության իրավունքից զրկելու վերաբերյալ:

Ըստ «Ակօս»-ի՝  Սահմանադրական դատարանի կողմից մերժում ստանալուց հետո Փայլանը որոշել է դիմել Մարդու իրավունքների եվրոպական դատարան:

«Երանի Թուրքիայի դատարանն այս հարցին լուծում տար: Իմ դեմ կայացված որոշումը հարված է ժողովրդավարությանը: Քանի որ մեր դատարանն այդ որոշումը չեղյալ չի համարել, ես կդիմեմ ՄԻԵԴ»,- ասել է պատգամավորը: