ՏԵՍԱՆՅՈՒԹ․ Մեծագույն պատվիրանը սերն է․ Սուրբ Սարգսի տոնը՝ փետրվարի 8-ին

Եկեղեցական ամբողջ քարոզչությունը հիմնված է սիրո ու սիրո քարոզչության վրա՝ ըստ Yerkir.am-ի ասաց Սուրբ Սարգիս եկեղեցու հոգևոր հովիվ Տեր Եսայի քահանա Արթենյանը՝ Սուրբ Սարգսի տոնին ընդառաջ մամուլի ասուլիսում։

Սիրո բարեխոս Ս. Սարգսի, նրա Մարտիրոս որդու և 14 զինվորների տոնը Հայ Եկեղեցին այս տարի նշում է փետրվարի 8-ին:

«Ավետարանը տալիս է պատգամ, որ սերը հավիտենական է։ Հավատք, հույս , սեր՝ ասում է, և սրանից մեծագույնը սերն է։ Այն նույնիսկ հավիտենական կյանքում է անհրաժեշտ»,-նշեց քահանա։

Թեև կյանքում շատ ենք խոսում սիրո կարևորության մասին, բայց, ըստ նրա, ինչքան շատ խոսում ենք՝ այնքան արժեզրկվում է սերը։

«Սուրբ Սարգսի տանը այն կարևոր հանգրվաններից մեկն է, երբ խոսում ենք սիրո մասին՝ հատկապես մեր աչքի առաջ ունենալով Սուրբ Սարգսի, նրա Մարտիրոս որդու և նահատակ 14 զինվորների օրինակը, ովքեր հենց այդ սիրով առաջնորդվեցին և նահատակության պսակին արժանացան։ Բնականաբար, սերը նրա համար չէ, որ անպայման նահատակվես, բայց սերը բերում է զոհավերության նաև փոխաբերական իմաստով»,-ասաց Տեր Եսային։

Սուրբ Սարգսի օրինակը, նրա խոսքով, կարևորն է՝ քաջությամբ ապրելու, պայքարելու և դավանելու բարձր արժեքներ։

Ամենայն Հայոց Գարեգին Բ Հայրապետի տնօրինությամբ Ս. Սարգիս զորավարի տոնը հռչակվել է Երիտասարդների օրհնության օր: