Լենա Նազարյանն էլ տրվեց իշխանական խմբային «հարձակվիր, որ պաշտպանվես» բնազդին. Մարուքյան

Սթափվեք, ընկերներ, տիկնայք ու պարոնայք, սթափվեք, քանի դեռ ուշ չէ։ Այս մասին Facebook-ի իր էջում գրել է «Լուսավոր հայաստան» խմբակցության ղեկավար Էդմոն Մարուքյանը:

Ըստ Yerkir.am-ի՝ նա, մասնավորապես, նշել է.

«Երեկ իմ շատ սիրելի գործընկեր Լենա Նազարյանն էլ տրվեց իշխանական խմբային «հարձակվիր, որ պաշտպանվես» բնազդին ու որոշեց դատափետել մեզ։ Իհարկե ԱԺ փոխխոսնակի զգացմունքային որոնումները անպատասխան թողնել չի կարելի, քանի որ այդ թեմայով մենք էլ շատ ասելիք ունենք։

Տիկին Նազարյանն ասում է, թե «Լուսավոր Հայաստան»-ը խցանվել է անցյալում։ Ուզում եմ հասկանալ, արդյոք այս խոսքերն իսկապես իրե՞նն են։ Ինքն է գրե՞լ, թե փոխխոսնակի միջոցով երրորդ մեկն է խոսում։ Եթե մտքերն այս Նազարյանինը չեն, ապա նրա հետ մենք քննարկելու ոչինչ չունենք, իսկ եթե՝ ոչ, ապա ցավում եմ, քանի որ նա էլ փաստացի մոլորության մեջ է ու փորձում է անցյալի պատրանքով կոտրել ապագայի հեռանկարը։

Բայց իրականում կարեւոր էլ չէ, թե ով է այդպիսի բարձրագոչ ու ապաքաղաքական տեքստեր արտաբերում, անկարեւորությունից անդին ընդամենը ուզում ենք արձանագրել հետեւյալը․

Կառավարող թիմը ոչ միայն խցանվել է անցյալում, այլ նաեւ քարացել է ու այլեւս ի զորու չէ առաջ շարժվել, քանի որ ապրում է 2018 թ․-ի ապրիլով։ Ավելին, մնացել է դրա ծանր ազդեցության տակ՝ կորցնելով իրականության զգացողությունն ու սթափ դատելու կարողությունը։ Հաղթանակի փառքն ու դրան հաջորդող հիվանդագին փառասիրությունը կուրացրել են հեղափոխական թիմին՝ դարձնելով դրան անգործունյա։

Իրականում հենց հեղափոխականներն են խցանվել իրենց կոմֆորմիզմի եւ պատեհապաշտության տիրույթում։ Խցանվել են իրենց աշխատասենյակներում ու աշխարհին նայում են կառավարական փոքրիկ պատուհաններից ու այնքան թեթեւությամբ, որ կարծես թե, իրենք չէին ժամանակին պայքարում կոմֆորմիզմի դեմ։

Խցանվել են իրենց ծառայողական մեքենաներում ու այնպիսի ինքնավստահ դեմքի արտահայտությամբ, որ կարծես թե, իրենք չէին ժամանակին պայքարում պադավատիզմի դեմ։

Խցանվել են իրենց կառավարական առանձնատներում՝ մոռանալով իրենց իսկ կողմից շեշտադրված հայտնի ճշմարտությունը․ Աղքատ երկրում չի կարելի ցոփ ու շվայտ կյանքով ապրել։

Խցանվել են իրենց խոսքերի մեջ, ավելին՝ դարձել են իրենց իսկ խոստումների գերին, քանի որ ամեն օր նոր խոստում տալն ու հաջորդ օրը դրա մասին մոռանալը, իսկապես մազոխիզմ է հիշեցնում։

Խցանվել են իրենց աշխարհացունց եւ տիեզերական պնդումների մեջ, քանի որ ամեն ուրբաթ հերքում են երկուշաբթի օրվա պնդածն ու համոզածը։

Խցանվել են իրենց աննախադեպ ռեֆորմների մեջ, քանի որ ոչինչ չեն կարողանում մինչեւ վերջ կյանքի կոչել՝ ստիպված լինելով ամեն անգամ նահաջել ու հետաձգել, քանի որ անվճռական են ու անհետեւողական։

Խցանվել են իրենց հանճարեղ կադրերի ընտրության գործում, քանի որ փառահեղ ռեֆորմատորները ամեն օր հեղինակազրկում եւ արժեզրկում են հեղափոխությունն ու կառավարող թիմին։

Խցանվել են իրենց քաղքենի բյուրոկրատիզմով, քանի որ իրենց գործընկերներին վերեւից են նայում, խցանվել են դատարանները շրջափակելով եւ ամբողջ աշխարհի առջեւ խայտառակ լինելով։ Խցանվել են ընդդիմության սահմանադրական իրավունքները սահմանափակելով, քանի որ նույնիսկ մի ԱԺ նիստ էլ ըստ պատշաճի չեն կարողանում կազմակերպել։

Խցանվել են հին ու նոր Հայաստանի միջանցնքներում եւ չեն կողմնորոշվում, թե որ ուղղությամբ շարժվել։

Խցանվել են վարկանիշը բարձր պահելու տենդագին ձգտումների մեջ ու իրական բարեփոխումներ անելու փոխարեն զբաղվում են վարկանիշափրկությամբ։

Խցանվել են վիճակագրական մանիպուլյացիաների ու մշտապես առաջինը լինելու ձգտումների մեջ։

Խցանվել են իշխանական քեֆերում եւ խրախճանքներում։

Խցանվել են ֆեյսբուքում եւ այն աստիճան, որ պետությունը կառավարում են ֆեյսբուքով։

Խցանվել են մուլտֆիլներում եւ ընդդիմությանը ակնարկներ են ուղարկում մուլտ հերոսների միջոցով։

Իսկ ամենավատն այն է, որ նրանք չեն հասկանում, որ դարձել են հին Հայաստանի արատավոր բարքերի, ավանդույթների եւ մոնոպոլ իշխանության ժառանգորդները։

Սթափվեք, ընկերներ, տիկնայք ու պարոնայք, սթափվեք, քանի դեռ ուշ չէ։ Հետո չասեք, թե Մարուքյանն ու Լուսավորը չեն զգուշացրել ու չեն էլ օգնել։ Այս պահի դրությամբ մենք փորձում ենք օգնել ձեզ, որ վերջապես սթափվեք։