Ներսիկ Նազարյանն ընդամենը 24 միլիո՞ն ունի

Երևանի նախկին ոստիկանապետ, այսօր արդեն ՀՀ արտակարգ իրավիճակների նախարարության փրկարար ծառայության տնօրենի տեղակալ, Երևան քաղաքի փրկարարական վարչության պետ Ներսիկ Նազարյանը պաշտոնը ստանձնելու օրվա դրությամբ հայտարարագրել է 30 հազար ԱՄՆ դոլար և 10 մլն դրամ գումար: Այս մասին Yerkir.am-ը տեղեկացավ բարձրաստիճան անձանց էթիկայի հանձնաժողովի հրապարակած հայտարարագրից:

Ուշագրավ է, սակայն, որ Ներսիկ Նազարյանը և նրա կինը՝ Նելլի Նազարյանը, պաշտոնը ստանձնելու օրվա դրությամբ որևէ անշարժ կամ շարժական գույք չեն հայտարարագրել: Տվյալներ չկան նաև Նազարյանի կամ նրա կնոջ հանձնած փոխառությունների և կատարած ներդրումների վերաբերյալ:

Նազարյանը ժամանակին համարվում էր երևանյան օլիգարխիայի կարկառուն ներկայացուցիչներից մեկը: Նրա ընտանիքի անվան հետ էին կապվում մի շարք բիզնեսներ և ընկերություններ, որոնցից շատերն այսօր լուծարվել կամ սնանկացել են,  օրինակ` «Բիզնես լիդեր գրուպ»-ը, «Մոսկվիչկա» սուպերմարկետների ցանցը:

Երևանի ոստիկանապետի պաշտոնից աղմկոտ պաշտոնանկությունից հետո Նազարյանը տևական ժամանակ մնացել էր առանց պաշտոնի: Եվ միայն այս տարվա հուլիսի 25-ին, գեներալներից մեկի միջնորդությամբ, նրան նշանակեցին Երևան քաղաքի փրկարարական վարչության պետ: Նոր պաշտոնը ստանալուց հետո Նազարյանը խուսափում է լրատվամիջոցների հետ շփումներից, առանց լրատվականի գիտության` լրագրողներին հարցազրույցներ չի տալիս: