Եվգենի Պետրոսյանը հինգերորդ անգամ է ամուսնացել

Հումորիստ Եվգենի Պետրոսյանն ամուսնացել Է իր 30-ամյա օգնական Տատյանա Բրուխունովայի հետ. ըստ Yerkir.am-ի՝ հայտնում է «Կոմսոմոլսկայա պրավդա»-ն: 

Նշվում է՝ Պետրոսյանը և Բրուխունովան ամուսնացել են 2019 թվականի դեկտեմբերի սկզբին:

74-ամյա արտիստի համար այս ամուսնությունը դարձել է հինգերորդը: Երեք օր առաջ հումորիստի կինը սպիտակ ծաղկեփնջի լուսանկար էր հրապարակել իր ինստագրամյան միկրոբլոգում և մեկնաբանություններում շատերն դեռ այդ ժամանակ ենթադրություններ էին անում, որ դրանք հարսանեկան ծաղիկներ են: Հավանաբար, ձմռան առաջին հանգստյան օրերին անցկացված ընտանեկան հանդիսությունը նվիրված Է եղել հենց այդ իրադարձությանը:

Բրուխունովան աշխատում էր հումորիստի նախկին կնոջ՝ Ելենա Ստեպանենկոյի հետ որպես նրա պաշտոնական կայքի ադմինիստրատոր: Նա զբաղվել է նաև համացանցում Պետրոսյանի  սոցիալական ցանցերի էջերի առաջխաղացմամբ, իսկ ավելի ուշ դարձել նրա օգնականն ու տնօրենը:

Հիշեցնենք, որ մեկ տարի առաջ՝ 2018 թվականի նոյեմբերին, Պետրոսյանը բաժանվել Էր Ստեպանենկոյից: