Մեծ հայրենականի ղարաբաղցի հերոսը 108 տարեկանում հեռացել է կյանքից

108 տարեկանում կյանքից հեռացել է Հայրենական մեծ պատերազմի վետերան Բորիս Սիմոնյանը: Այս մասին տեղեկությունը, ըստ yerkir.am-ի, տեղադրված է Ռուսական գիտության և մշակույթի երևանյան կենտրոնի ֆեյսբուքյան էջում: Բորիս Սիմոնյանը բնակվում էր Մոսկվայում: Նա Հայրենական մեծ պատերազմի՝ ՌԴ տարածքում բնակվող ամենատարեց հայ վետերանն էր:

Բորիս Սիմոնյանը ծնվել է 1911  թվականին Լեռնային Ղարաբաղի Շահումյանի շրջանի Վերին Աղջիքենդ գյուղում: Մինչև պատերազմի սկսվելը հայրենի գյուղում ուսուցչություն է արել: Երբ պատերազմը սկսվել է, ավարտել է Բաքվի հետևակային ուսումնարանն ու 1942-ին մեկնել ճակատ: Կռվել է Ուկրաինական երրորդ ճակատում, մասնակցել Կուրսկի և Յասկո-Քիշնևյան գործողություններին: Խորհրդային բանակի կազմում ազատագրել է Հունգարիան: Մայիսի 9-ը դիմավորել է Բուլղարիայում:

Պարգևատրվել է «Մարտական ծառայության համար» մեդալով և այլ արժեքավոր պարգևներով, որոնցից ամենաշատը հպարտանում էր «Կարմիր աստղ» շքանշանով: