ԵՄ-ն պետք է ճանաչի Պաղեստինը՝ որպես անկախ պետություն. Լյուքսեմբուրգի ԱԳ նախարար

Լյուքսեմբուրգի արտաքին գործերի նախարար Ժան Ասելբորնը կողմ է արտահայտվել, որ Եվրամիությունը ճանաչի Պաղեստինը՝ որպես անկախ պետություն: Այդ կարծիքը նա հայտնել է կիրակի  Tagesspiegel am Sonntag գերմանական թերթում հրապարակված հարցազրույցում. ըստ Yerkir.am-ի՝ հայտնում է ՏԱՍՍ-ը:

«Եվրամիությունը պետք է քննարկի այն, որ արդեն ժամանակն է, որ ԵՄ անդամ երկրները ճանաչեն Պաղեստինը՝ որպես անկախ պետություն»,-ասել է Ասելբորնը ու հավելել, որ այդ կերպ Բրյուսելը կարող էր ներկայանալ որպես հակակշիռ Վաշինգտոնին ու ԱՄՆ նախագահ Դոնալդ Թրամփի մերձարևելյան քաղաքականությանը:

«Մենք գիտենք, թե որքան բարդ է հատկապես Գերմանիայում, ինչպես նաև Ֆրանսիայում, Բելգիայում, Նիդերլանդներում, Իսպանիայում և Լյուքսեմբուրգում անհատապես ճանաչել Պաղեստինը: Սակայն եվրոպական նախաձեռնության շրջանակում դա միանգամայն հնարավոր կլիներ»,- ասել է նախարարն ու շեշտել. «Ամբողջ ԵՄ-ի կողմից Պաղեստինի ճանաչումն ազդանշան կլիներ, որ պաղեստինցիներն ունեն հայրենիքի, պետության կարիք այնպես, ինչպես և իսրայելցիները»:

Քաղաքական գործիչը պնդել է. «Եթե իսրայելյան բնակեցման քաղաքականությունը և պաղեստինցիների տները ոչնչացնելը շարունակվում են, ապա պարզապես որևէ հեռանկար չի մնում պաղեստինյան պետության համար: Միջազգային իրավունքի դրույթները պահպանելուց հրաժարվելը կհանգեցնի, որ Մերձավոր Արևելքում կլինի լրացուցիչ առնվազն 5 մլն փախստական: Դա չի կարող բխել Իսրայելի շահերից»:

Հիշեցնենք, որ նոյեմբերի 18-ին ԱՄՆ պետքարտուղար Մայք Պոմպեոն հայտարարել էր, որ Վաշինգտոնը, հասկանալով իրավիճակը, այլևս չի համարում, որ Հորդանանի արևմտյան ափին հրեական բնակավայրերի առկայությունը միջազգային իրավունքի խախտում է: Իսրայելում ողջունել են այդ որոշումը: Իրենց հերթին պաղեստինյան կողմի ներկայացուցիչները հայտարարել են, որ ԱՄՆ վարչակազմը որևէ լիազորություն չունի չեղարկելու միջազգային բանաձևերը, որոնք առնչվում են բնակավայրերին: