Freedom House-ը ԼՂՀ-ն ճանաչում է որպես անկախ պետություն

Freedom House միջազգային իրավապաշտպան կազմակերպությունն այսօր հրապարակել է ժողովրդավարական բարեփոխումների վերաբերյալ իր ամենամյա զեկույցը, որում Հայաստանը եւ Լեռնային Ղարաբաղի Հանրապետությունը ընդգրկվել են մասամբ ազատ երկրների շարքում:

Զեկույցում նշվում է, որ քաղաքական իրավունքների առումով Արցախը բարելավել է իր դիրքը մեկ կետով` «Ազատություն աշխարհում» սանդղակով` դուրս գալով  ոչ ազատ երկրների շարքից: Նշվում է, որ Արցախի կարգավիճակը բարձրացվում է` հաշվի առնելով իրական ընդդիմության մասնակցությամբ մրցունակ նախագահական ընտրությունների անցկացումը:

Հայաստանի վերաբերյալ եւս նշվում է, որ դիրքերը բարելավվել են շնորհիվ մայիսին անցկացված խորհրդարանական ընտրությունների հետեւանքով արմատական ընդդիմության` խորհրդարան անցնելու:

Զեկույցի համաձայն` Վրաստանը նույնպես մասամբ ազատ երկիր է, իսկ Ադրբեջանը շարունակում է մնալ ոչ ազատ երկրների թվում:

Freedom House-ի ուսումնասիրած 195 երկրներից ազատ են 87-ը, որտեղ բնակվում է երկրագնդի բնակչության 43 տոկոսը: