ՏԵՍԱՆՅՈՒԹ․ «Դոլմամա»-ի հրդեհից մարդ չի տուժել. ՓԾ գնդապետ

Հրդեհի առաջացման պատճառներն այս պահին չենք կարող ասել, բայց հրդեհը մեկուսացված է, և կատարվում են մարման աշխատանքներ՝ Yerkir.am-ի հետ զրույցում տեղեկացրեց ԱԻՆ փրկարար ծառայության ճգնաժամային կառավարման ազգային կենտրոնի պետի տեղակալ, ՓԾ գնդապետ Արթուր Ոսկանյանը:

Ըստ նրա՝ հրդեհի լիակատար մարումից հետո, հետաքննական մարմինները կպարզեն պատճառը:

Հարցին՝ արդյո՞ք հրդեհից որևէ մեկը տուժել է, Ոսկանյանը պատասխանեց. «Իմ տեղեկությամբ՝ որևէ մեկին վնաս չի պատճառվել, հիմնականում շինության տանիքային մասն է այրվել, մոտավորապես՝ 450 քմ տարածք»:

ՓԾ գնդապետը փաստեց, որ մարման աշխատանքները կավարտվեն մոտ 40 րոպեից:

«Դոլմամա» ռեստորանի մոտ էր նաև երգիչ, Երևանի ավագանու «Իմ քայլը» խմբակցության անդամ Արթուր Իսպիրյանը: Նա Yerkir.am-ի հետ զրույցում նշեց, որ հրդեհի մասին համացանցից է տեղեկացել և եկել է իր մանկության վայրը՝ Երևանի իր սիրած հատվածը:

Ավելի վաղ Yerkir.am-ը հայտնել էր, որ հրդեհի տարածքի բնակիչները պնդում են, որ այն միտումնավոր է կատարվել ՝ պատմական հուշարձանները ոչնչացնելու նպատակով: Հրդեհի բռնկման մանրամասների մասին հայտարարություն էր տարածել  ԱԻՆ-ը: