Թուրքիան հորատման աշխատանքներ է սկսում Կիպրոսի ջրերում

«Թուրքական «Fatih» նավը նավթի ու գազի հորատման աշխատանքներ կսկսի Կիպրոսի ջրերում: Այս մասին հայտարարել է Թուրքիայի փոխնախագահ Ֆուադ Օքթայը»,-գրում է sabah.com կայքը:

Օքթայն անդրադարձել է նաև Կիպրոսի ջրային տարածքներում հորատման աշխատանքներ կատարելու պատճառով՝ ԵՄ արտգործնախարարների հաստատած ծրագրին, ըստ որի՝ Թուրքիայի նկատմամբ պետք է պատժամիջոցներ կիրառվեն:

«Որպես պատրվակ դիտարկելով Միջերկրական ծովի արևելյան հատվածում կատարվող հորատման աշխատանքները՝  ԵՄ արտգործնախարարները պատժամիջոցների ծրագիր են հաստատել, որը որևէ իրավական ուժ չունի»,-նշել է Օքթայը:

Թուրքիան նախկինում հորատման աշխատանքների համար Կիպրոս էր ուղարկել նաև «Yavuz» նավը: Ըստ Թուրքիայի՝ Հյուսիսային Կիպրոսի ինքնահռչակ հանրապետությունը ևս իրավունք ունի կղզու ջրերի պաշարների նկատմամբ, սակայն Կիպրոսի Հանրապետության իշխանությունները չեն համաձայնվում այդ դիրքորոշման հետ՝ նշելով, որ Կիպրոսի Հանրապետությունը միակ պաշտոնապես ճանաչված պետությունն է կղզու տարածքում: