Այս օրերին է ազգային սերմը զատվում որոմից. ՎՊՀ-ի պրոֆեսորը ողջունում է ուսանողական շարժումը

«Հանուն հայոց լեզվի ու գրականության, հանուն հայոց պատմության ու հայ եկեղեցու, հանուն ազգային արժեքների իրենց բողոքի ձայնը բարձրացրած ուսանողությունն արժանի է մեծագույն հարգանքի և գնահատանքի ու պիտի մնա մեր պատմության մեջ` որպես հայոց ինքնության սերմացու», - Yerkir.am-ի հետ զրույցում այսպես գնահատեց ԿԳՄՍ նախարարի հրաժարականը պահանջող ուսանողական շարժման գործողությունները՝ Վանաձորի պետական համալսարանի գրականության ամբիոնի պրոֆեսոր, բ.գ.դ. Վանո Եղիազարյանը:

Նրա խոսքերով՝ այս պատասխանատու օրերին է ազգային սերմը զատվում որոմից, երբ լսելի է դառնում ազգիս արդարամիտ ու ազնիվ մտավորականության ձայնը, իսկ որոշ անդեմ մտավորական հորջորջված արարածներ` ծածուկ ակնկալիքներով լռում են, կամ որ ավելի վտանգավոր է, փորձում են նենգափոխել փաստերը, ի հեճուկս որոնց ընդվզում են հայեցի կրթության պահանջատեր հայ երիտասարդները։

«Նրանց եմ հղում հեռակա ողջույններս Լոռվա իմաստուն աշխարհից», - եզրափակեց իր խոսքը գրականագետը:

Հիշեցնենք՝ ՀՀ ԿԳՄՍ նախարար Արայիկ Հարությունյանի հրաժարականի պահանջով բողոքի ակցիաների մեկնարկը տրվել էր անցած շաբաթ:

Բողոքի ակցիայի մասնակիցները հայտարարել են, որ Արայիկ Հարությունյանը համատեղելի չէ զբաղեցրած պաշտոնի հետ: